Home / ಲೇಖನ / ಇತರೆ / ದಿ ಡೈರಿ ಆಫ್ ಎ ಎಂಗ್ ಗರ್‍ಲ್ – ಆನ್‌ ಫ್ರಾಂಕ್ – ಗುರುವಾರ, ಅಕ್ಟೋಬರ್ ೨೯, ೧೯೪೨

ದಿ ಡೈರಿ ಆಫ್ ಎ ಎಂಗ್ ಗರ್‍ಲ್ – ಆನ್‌ ಫ್ರಾಂಕ್ – ಗುರುವಾರ, ಅಕ್ಟೋಬರ್ ೨೯, ೧೯೪೨

ಪ್ರೀತಿಯ ಕಿಟಿ,

ನಾನಂತೂ ತುಂಬಾ ಬೇಸರದಲ್ಲಿರುವೆ. ಡ್ಯಾಡಿಗೆ ಹುಷಾರಿಲ್ಲ. ಅವರಿಗೆ ಮೈಮೇಲೆಲ್ಲಾ ಕೆಂಪು ಸಿಬ್ಬುಗಳು ಎದ್ದಿವೆ. ತುಂಬಾ ಜ್ವರವೂ ಇದೆ. ನೋಡಿದರೆ ದಡಾರ ಇರುವಂತಿದೆ. ನೋಡು! ನಾವೀಗ ಡಾಕ್ಟರನ್ನು ಕರೆಯುವಂತೆಯೂ ಇಲ್ಲ. ಮಮ್ಮಿ ಅವರಿಗೆ ಬೆವರು ಬರಿಸುವಂತೆ ಮಾಡುತ್ತಿದ್ದಾರೆ. ಅದರಿಂದಲಾದರೂ ಅವರ ಜ್ವರದ ತಾಪ ಇಳಿಯಬಹುದೆಂದು.

ವ್ಯಾನ್ಡ್ಯಾನ್‌ರ ಮನೆಯಿಂದ ಎಲ್ಲ ಸಾಮಾನುಗಳು ತೆಗೆಯಲಾಗಿದೆ ಎಂದು ಇಂದು ಮುಂಜಾನೆ ಮೇಪ್ ನಮಗೆ ಹೇಳಿದಳು. ನಾವಿನ್ನು ಶ್ರೀಮತಿ ವ್ಯಾನ್ಡ್ಯಾನ್‌ರಿಗೆ ಅದನ್ನು ಹೇಳಿಲ್ಲ. ಅವರಂತೂ ಮೊದಲೇ ತೀರಾ ಉದ್ವೇಗದವರು. ತಮ್ಮ ಮನೆಯಲ್ಲಿ ಬಿಟ್ಟು ಬಂದ ಚೆಂದದ ಪಿಂಗಾಣಿ ಪಾತ್ರೆಗಳ ಸುಂದರವಾದ ಕುರ್ಚಿಗಳ ಕುರಿತೇ ದಿನವಿಡಿ ಗೋಳಿಡುವುದನ್ನು ಕೇಳಲು ನಮಗಾರಿಗೂ ಇಷ್ಟವಿರಲಿಲ್ಲ. ನಮ್ಮ ಅತ್ಯಮೂಲ್ಯವಾದ ವಸ್ತುಗಳನ್ನು ನಾವು ಬಿಡಲೇಬೇಕಿತ್ತು. ಹಾಗಾಗಿ ಅದಕ್ಕಾಗಿ ಈಗ ಬೊಬ್ಬಿರಿಯುವುದು ಸರಿಯಲ್ಲ.

ತಡವಾಗಿಯಾದರೂ ನನಗೂ ವಯಸ್ಕರು ಓದುವ ಪುಸ್ತಕವನ್ನು ಓದಲು ಅನುಮತಿ ಸಿಕ್ಕಿದೆ. ನಿಕೋ ವ್ಯಾನ್ ಬರೆದ “Eva’s Youth” ಈಗ ನಾನು ಓದುತ್ತಿರುವೆ. ಶಾಲಾ ಹುಡುಗಿಯ ಪ್ರೇಮ ಕಥೆಗಳಿಗೂ ಮತ್ತು ಇದಕ್ಕೂ ಅಂತಹ ವ್ಯತ್ಯಾಸವಿಲ್ಲ. ಹಿಂದುಳಿದ ಬೀದಿಗಳಲ್ಲಿ ಕೆಲವು ಹೆಂಗಸರು ತಮ್ಮನ್ನು ಅಪರಿಚಿತ ಗಂಡುಗಳಿಗೆ ಮಾರಿಕೊಳ್ಳುತ್ತಾರೆ ಎನ್ನುವುದು ಸತ್ಯ. ಅದಕ್ಕಾಗಿ ಅವರು ಹಣವನ್ನು ಕೇಳುತ್ತಾರಂತೆ. ಅಂತಹ ಪರಿಸ್ಥಿತಿ ಏನಾದರೂ ಬಂದಿದ್ದರೆ ನಾನು ಮರ್ಯಾದೆಯಿಂದ ಸತ್ತೇ ಹೋಗುತ್ತಿದ್ದೆ. ಅಲ್ಲದೇ ಇವಾ ಆ ಹೊತ್ತು ತಿಂಗಳ ಪಿರಿಯಡ್‌ನಲ್ಲಿ ಇದ್ದಳೆಂದು ಕಥೆ ಹೇಳುತ್ತದೆ. ಓ! ಈ ತಿಂಗಳ ಅವಧಿ ನನಗೂ ಬರಲೆಂದು ಬಯಸುವೆ: ಅದು ಬಹು ಮುಖ್ಯವಾದದ್ದು.

ಡ್ಯಾಡಿ ಗಯಟೆ ಮತ್ತು ಸ್ಚಿಲ್ಲರ್‌ನ ನಾಟಕಗಳನ್ನು ಕಬೋರ್ಡಿನಿಂದ ಹೊರ ತೆಗೆದು ತಂದಿದ್ದಾರೆ. ಪ್ರತಿ ದಿನ ಸಂಜೆ ಅದನ್ನು ನನಗವರು ಓದಿ ಹೇಳಲಿದ್ದಾರೆ. ನಾವು ಡಾನ್ ಕ್ಯಾರ್‍ಲೋಸ್‌ರಂದಿಗೆ ಅದನ್ನು ಶುರು ಮಾಡಿದ್ದೇವೆ.

ಡ್ಯಾಡಿಯನ್ನು ನೋಡಿ ಮಮ್ಮಿಯೂ ತನ್ನ ಪಾರ್ಥನಾ ಪುಸ್ತಕವನ್ನು ನನ್ನ ಕೈಯಲ್ಲಿ ತುರುಕಿದ್ದಾರೆ. ಅವರಿಗೆ ನಮ್ರವಾಗಿ ನಾನು ಕೆಲವು ಪಾರ್ಥನೆಗಳನ್ನು ಜರ್ಮನಿಯಲ್ಲಿ ಓದಿದೆ. ಅವು ನಿಜಕ್ಕೂ ಚೆನ್ನಾಗಿವೆ. ಆದರೆ ಅವು ನನಗೆ ಹೆಚ್ಚಿನದೇನನ್ನೂ ತಿಳಿಸುತ್ತಿಲ್ಲ. ಮಮ್ಮಿ ಯಾಕಾಗಿ ನನ್ನನ್ನು ಧಾರ್ಮಿಕಳನ್ನಾಗಿಸಲು ಬಯಸುತ್ತಾರೆ, ಅವರಿಗೆ ವಿಧೇಯಳಾಗಿರಲೆಂದೇ?

ನಾಳೆ ಮೊದಲ ಸಲ ನಾವು ಕಾಯಿಸಿಕೊಳ್ಳಲು ಬೆಂಕಿಯನ್ನು ಮಾಡಲಿದ್ದೇವೆ. ಹೊಗೆಯಿಂದ ಉಸಿರುಗಟ್ಟಿದಂತಾಗಬಹುದೆಂದು ನನ್ನ ಊಹೆ. ಯಾಕೆಂದರೆ ಎಷ್ಟೋ ಕಾಲದಿಂದಲೂ [ಹೊಗೆಗೊಳುವೆ] ಚಿಮಣಿಯನ್ನು ಸ್ವಚ್ಛಗೊಳಿಸಿದ ಹಾಗಿಲ್ಲ. ಆದರೂ ಆಶಾವಾದದಿಂದಲೇ ಎದಿರು ನೋಡೋಣ.

ನಿನ್ನ,
ಆನ್

Tagged:

Leave a Reply

Your email address will not be published. Required fields are marked *

ಒಂದೇ ರೂಮಿನಲ್ಲಿದ್ದರೂ ಅವನನ್ನು ನನ್ನ ಸ್ನೇಹಿತ ಎಂದು ಮನಸ್ಸು ಒಪ್ಪಿಕೊಂಡಿರಲಿಲ್ಲ. ರಾತ್ರಿ ನಿದ್ದೆಗಾಗಿ ಮಾತ್ರ ಅವನಿಗದೊಂದು ರೂಮು. ಊಟತಿಂಡಿ ಎಲ್ಲಾ ಹೋಟೆಲ್ಲು. ನಾನು ಸಂಜೆ ಏಳಕ್ಕೆ ರೂಮಿಗೆ ಬಂದರೆ ಅವನು ಹತ್ತಕ್ಕೆ ಬರುತ್ತಿದ್ದ. ಬೆಳಿಗ್ಗೆ ಅವನು ಹತ್ತಕ್ಕೆ ಹೊರಟರೆ ನಾನು ಒಂದ...

ಚಾಮುಂಡಿ, ದುರ್ಗಿ, ಕಾಳಿ, ಶಂಕರಿ, ಮಾರಿ ಮೊದಲಾದ ದೇವಿಗಳಿಗೂ : ಆಂಜನೇಯ, ವಲ್ಲಭರಾಯ, ನರಸಿಂಹ ಮೊದಲಾದ ದೇವರುಗಳಿಗೂ ನಮ್ಮೂರಲ್ಲಿ ಏನೂ ಕೊರತೆಯಿಲ್ಲ. ಇಲ್ಲೊಂದು ಶಂಕರಿ ದೇವಾಲಯ ಬಹುಕಾಲದಿಂದಲೂ ಇದೆ. ಅದನ್ನು ಕಟ್ಟಿಸಿದವರು ಯಾರೆಂಬುದೇ ಗೊತ್ತಿಲ್ಲ. ಪ್ರತಿ ಶನಿವಾರ ಅಭಿಷೇಕ, ಶುಕ್ರ...

ರಾಜ ನಿಮಗೆ ಗೊತ್ತೆ? ಇಲ್ಲ? ಆತ ನನ್ನ ಸ್ನೇಹಿತ, ಆಪ್ತ ಸ್ನೇಹಿತ. ಅವನಿಗೂ ಕತೆ ಬರೆಯುವ ಹುಚ್ಚಿದೆ. ಆದರೆ ಬರೆದು ಸಂಪಾದಿಸಿ ಬದುಕುವ ಹಟವಿಲ್ಲ. ಹಾಗೆಂದೇ, ತಕ್ಕಮಟ್ಟಿಗೆ ಸಂಪಾದನೆ ಇರುವ ಬೇರೆ ಉದ್ಯೋಗದಲ್ಲಿದ್ದಾನೆ! ರಾಜ ಬರೆದಿರುವ ಒಂದು ಕಥೆ ನನ್ನಲ್ಲಿದೆ. ಓದಿ ನೋಡುತ್ತೀರಾ? ನಿಮ...

ಅಂದು ನಾನು, ನಮ್ಮ ತಾತ, ನನ್ನ ತಂಗಿ ಎಲ್ಲರೂ ಕಣದಲ್ಲಿ ಕುಳಿತುಕೊಂಡು ಹರಟೆ ಹೊಡೆಯುತ್ತಿದ್ದೆವು. ಸುಗ್ಗಿಯ ಕಾಲವಾದ್ದರಿಂದ ರೈತರು ಮತ್ತು ಆಳುಗಳು ಕಣದಲ್ಲಿ ಕೆಲಸ ಮಾಡುತ್ತಿದ್ದರು. ನಮ್ಮ ತಾತನು ಆ ಮಾತು ಈ ಮಾತು ಆಡುತ್ತಿದ್ದರೂ, ಆತನ ಒಂದು ಕಣ್ಣು ಮಾತ್ರ ಕೆಲಸಗಾರರ ಮೇಲೆಯೇ ಇರುತ್...

ರಾಜಗೃಹದ ಬಳಿಯ ಗೃಧ್ರಕೂಟ ಪರ್ವತ. ಪರಮಾತ್ಮನಾದ ಬುದ್ಧದೇವನ ಪವಿತ್ರ ಪಾದಧೂಳಿಯಿಂದ ಪುನೀತವಾದ ಗಿರಿವರದ ನೆತ್ತಿ. ನೆತ್ತಿಯ ನೆಲೆಯಲ್ಲಿ ಎರಡು ಗುಹೆಗಳು. ಅಲ್ಲಿ ಇಬ್ಬರು ಬೌದ್ಧ ಸನ್ಯಾಸಿಗಳು ಧ್ಯಾನಶೀಲಾನುಷ್ಠಾನಾದಿಗಳಿಂದ ನಿರ್‍ವಾಣವನ್ನು ಸಾಧಿಸುತ್ತಿದ್ದರು. ಇಬ್ಬರೂ ಅಕ್ಕ ಪಕ್ಕದ ...

ವ್ಹಾಲೆಂಟಾಯಿನ್ ಡಿಗ್ಬಿಯು ಭೋಜನವನ್ನು ತೀರಿಸಿಕೊಂಡು ‘ಹಾವಾನಾ ಸಿಗರ’ (ತಂಬಾಕದ ಸುರುಳೆ) ಸೇದುತ್ತೆ ತನ್ನ ಆರಾಮ ಕುರ್ಚಿಯಲ್ಲಿ ಯಥಾಸುಖವಾಗಿ ಕುಳಿತು ಏನೇನೋ ವಿಚಾರ ಮಾಡುತ್ತಿದ್ದನು. ಸುಗಂಧಿತವಾದ ಸಿಗರದ ಹೊಗೆಯು ಕಾಮಿನಿಯ ಕೇಶಕಲಾಪದಂತೆ ಸುರುಳೆ ಸುರುಳೆಯಾಗಿ ಅಂತರಿಕ್ಷದಲ್ಲಿ ಗಾಳ...