ಮಾಟ ಮಾಟ, ಇದು ಯಾವ ಆಟ
ಈ ಬಟಾ ಬಯಲಿನಲ್ಲಿ.
ಅಚ್ಚ ಅರಿವು ಬರಿ ಬಚ್ಚ ಅರಿವು
ಹೊಸ ಹೊಚ್ಚ ಅರಿವಿನಲ್ಲಿ.
ಅರೆ ಅರಿವಿನಲ್ಲಿ ಮರೆ ಅರಿವಿನಲ್ಲಿ
ಹೊರ ಅರಿವಿನಲ್ಲಿ ನೀನು
ತೆರೆ ಅರಿವಿನಲ್ಲಿ ಬರೆ ಅರಿವಿನಲ್ಲಿ
ಕೊರೆ ಅರಿವಿನಲ್ಲಿ ನೀನು.
ಮುರಿವರಿವಿನಲ್ಲಿ ಮೆರೆವರಿವಿನಲ್ಲಿ
ನೆರೆವರಿವಿನಲ್ಲಿ ನೀನು
ನುರಿವರಿವಿನಲ್ಲಿ ನೊರೆವರಿನಿನಲ್ಲಿ
ತೊರೆವರಿವಿನಲ್ಲಿ ನೀನು.
ನೆಲದರಿವಿನಲ್ಲಿ ನೀರರಿವಿನಲ್ಲಿ
ಉರಿವರಿವಿನಲ್ಲಿ ಅನಿಲ
ಬಾನರಿವಿನಲ್ಲಿ ತಾನರಿವಿನಲ್ಲಿ
ಹರಿವರಿವಿನಲ್ಲಿ ಅನಲ.
ಅನಲ, ಅನಿಲ ಸಂಯೋಗದಲ್ಲಿ ಗೋ
-ಪುರವ ಕಟ್ಟಿ ಅರಿವು
ಮರೆವಿನೊಂದು ಮರೆಯಲ್ಲಿ ಮನೆಯ
ಕಟ್ಟಿಹುದು ಬಯಲ ಇರವು.
ಹರವೆ ತಗ್ಗುತಿದೆ; ಹರವೆ ನುಗ್ಗುತಿದೆ
ಹಿಗ್ಗುತಿಹುದು ಹರವು
ಮೊಗ್ಗು ಮೊಗ್ಗಾಗಿ; ಅರಳು ಅರಳಾಗಿ
ಹರಳುಗೊಳುವ ಇರವು.
ಅರಬು ಏಕೆ? ಬರಬೇಕೆ? ಮರೆವೊ? ಓ
ಅರಿವೆ ಅರಿವೆ ಇಹುದು
ಸ್ವರದ ಮೂರ್ಛನೆಗೆ ರಾಗ ಲಯದ ಕಲೆ
ತಲೆಯ ತೂಗುತಿಹುದು.
ತಾ ಎಂದ ಅರಿವು ಬಾ ಎನುವ ಅರಿವು
ನಾ ಎನುವ ಅರಿವು ಇಳಿದು
ಜೋ ಎನುವ ಅರಿವು ಭೋ ಎನುವ ಅರಿವು
ಬರುತಿಹುದು ತಮವ ಕಳೆದು.
*****
