ಮಾತಲಿ ಮಮತೆ ತುಂಬಿರಬೇಕು
ಮಾತಲಿ ಕರುಣೆ ಕಾಣುತಿರಬೇಕು|
ಮಾತಲಿ ಹಿತ ತೋರುತಿರಬೇಕು
ಮಾತು ಮಾತಲಿ ಸತ್ಯಮೆರೆಯುತಿರಬೇಕು||
ಮಾತಲಿ ಪ್ರೀತಿ ತೇಲುತಿರಬೇಕು
ಮಾತಲಿ ವಾತ್ಸಲ್ಯ ಕಾಣಸಿಗಬೇಕು|
ಮಾತಲಿ ಸ್ನೇಹಹಸ್ತವದು ಸಿಗಬೇಕು
ಮಾತು ಅಂತರಂಗದ ಕದವ
ತೆರೆಯುವಂತಿರಬೇಕು|
ಮಾತಲಿ ಭಕ್ತಿ ಮನೆಮಾಡಿರಬೇಕು
ಮಾತು ಸೂರ್ಯಪ್ರಭೆಯಂತೆ ಪ್ರಕಾಶಿಸುತಿರಬೇಕು|
ಮಾತು ಹುಣ್ಣಿಮೆಯ ರಾತ್ರಿಯಲಿ
ಬೆಳಗುವ ತುಂಬು ಚಂದ್ರಮನಂತಿರಬೇಕು||
ಮಾತಲಿ ಔಚಿತ್ಯ ಔದಾರ್ಯತೆ ಇರಬೇಕು
ಮಾತು ಮುತ್ತಿನಂತೆ ಹೊಳೆಯುತಿರಬೇಕು|
ಮಾತಲಿ ಆಮಂತ್ರಣ ಆಹ್ವಾನತೆ ಬರಬೇಕು
ಮಾತು ನೊಂದವರ ಮನಮುಟ್ಟುತಿರಬೇಕು|
ಮಾತು ದೇವರ ಗುಡಿಯಲಿ ನಂದಾದೀಪದ
ಜೊತೆ ಆಗಾಗ ಮೊಳಗುವ ಘಂಟಾನಾದದಂತಿರಬೇಕು|
ಮಾತು ಮಡಕೆಯ ತೂತಾಗದೆ ಮೌನದ
ಬೆಲೆಗಿಂತ ಬೆಳ್ಳಿ ಬೆಳಕಾಗಬೇಕು||
*****
