ಅಮ್ಮ ನಿನ್ನ ಕೈ ತುತ್ತು ತಿನ್ನೋ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಹಕ್ಕಿ ಗೂಡು ಸೇರಿ
ಮುದ್ದು ಮರಿಗೆ ಗುಟುಕು ಹಾಕುವ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಅಂಬೆಗಾಲ ಇಟ್ಟ ಕಂದ
ಅಮ್ಮನ ಮಡಿಲ ಸೇರಿ ನಲಿವ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಅಣ್ಣ ತಮ್ಮನ ಪ್ರೀತಿ
ಅಕ್ಕ ತಂಗೀರು ಜೋಗುಳ ಹಾಡುವ
ಹೊತ್ತು ಸ್ವರ್ಗದ ಬಾಗಿಲು ತರೆದಾಯ್ತು ||
ಗೆಳೆಯ ಗೆಳತೀರು ಕೂಡಿ
ಅಪ್ಪಾಳೆ ತಿಪ್ಪಾಳೆ ರತ್ತೊ ರತ್ತೋ ಆಡಿ ಕುಣಿವ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಮುಂಗಾರ ಮಳೆಯಲ್ಲಿ
ಸಿಂಗಾರ ಹೊಲದಲಿ ನೇಸರ ಹೊಂಗಿರಣ ಬೀರುವ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಸುಗ್ಗಿ ಕಾಲದ ಮುಂಜಾನೆ ಹರುಷ
ಹಸನಾದ ರೈತನ ಬಾಳಿನ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಹುಣ್ಣಿಮೆ ರಾತ್ರಿಯಲ್ಲಿ ಚೆಂದಾದ ಬೆಳಕಲ್ಲಿ
ಇಂಪಾದ ಗಾನ ಬೆರೆತಾದ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಹಸೆ ಮಣೆ ಏರಿದ ಮದುಮಗಳ ಮೊಗವು
ನಾಚಿದ ಅರಿಶಿನ ಕುಂಕುಮ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಜನನಿ ಜನ್ಮ ಭೂಮಿಯಲಿ
ಹುಟ್ಟಿ ಬೆಳದು ತಾಯ ಸೇವೆ ಮಾಡೋ
ಹೊತ್ತು ಸ್ವರ್ಗದ ಬಾಗಿಲು ತೆರೆದಾಯ್ತು ||
ಅಮ್ಮಾ ನಿನ್ನ ಕೈ ತುತ್ತು ತಿನ್ನೋ ಹೊತ್ತು
ಸ್ವರ್ಗದ ಬಾಗಿಲು ತೆರೆದಾಯ್ತು ||
*****
