೧
ಅನಂತ ಶೂನ್ಯದಾಳದಲಿ,
ದುರಂತವಾದಗಾಧದಲಿ
ವಿಶಾಲ ನೀಲ ಮಾಲೆಯಲಿ
ತಾರೆಯೊಂದು ಮೆರೆಯಲಿ!
೨
ಆರಿಗೇನು? ಏತಕೆಂದು?
ಅರಿಯಲಾರು ಬಲ್ಲರಿಂದು?
ದಿನವದರಳಿ ಬಾಡಲ೦ದು,
ಮಿನುಗಿ, ಮಿರುಗಿ ಕಾ೦ಬುದು!
೩
‘ತನ್ನ ಬೆಳಕಿದಲ್ಪವೇನೊ,
ಇನ್ನು ಲೋಕವರಿಯದೇನೊ!’
ಅದರ ತಿಳಿವೆ ಇಲ್ಲವು;
ಉದಿಸುತಿಹುದು ನಿತ್ಯವೂ!
೪
ಹಿಂದೆ ಹಗಲು ಮುಗಿದಿದೆ;
ಮುಂದೆ ಹಗಲು ಬರಲಿದೆ.
ನಡುವೆ ನಿಶಿಯ ಗಗನದೆ
ಒಡನೆ ತಾರೆ ಮಿನುಗಿದೆ!
೫
ಸೂತ್ರ ಬದ್ಧ ರೀತಿಯಲ್ಲಿ,
ಅತ್ತ ಶೂನ್ಯ ವೀಥಿಯಲ್ಲಿ
ನಿಶಿಯ ವಿಪುಲ ಕಾಲದಲ್ಲಿ
ಎಸೆಯೆ ಹೇತುವೇನದಲ್ಲಿ?
೬
ಮರೆತ ವೇಳೆ ತಿಳಿಯದು;
ಬರುವ ಕಾಲವರಿಯದು.
ಮಧ್ಯ ಜನ್ಮವೇಕದು?
ಶುದ್ಧ ಶೂನ್ಯವೇನದು?
೭
ಏನೊ,- ಏಕೊ,- ಅರಿಯದು.
ಅನಂತ ಶೂನ್ಯವಿರುವುದು.
ಅವನ ಸೂತ್ರದಂತಿದು
ಮಿನುಗುತಿಹುದು-ದಿಟವದು!
*****
೧೯೩೪
