ಓ! ವಾಣಿ! ಸರಸಕವಿತಾಶ್ರೇಣಿ, ಅಜನ ಸ-
ಟ್ಟದ ರಾಣಿ, ರಸಿಕ ಜನ ಹೃದ್ವಲ್ಲಕಿಯ ತಂತ್ರಿ-
ಯಂ ಮಿಡಿಸಿ ಮಂದಹಾಸಂಗೈವ ದಿವ್ಯ ವೀ-
ಣಾಪಾಣಿ, ಫಣಿವೇಣಿ, ಶುಭವಾಣಿ ನಮಿಸುವೆಂ
ಭಯ ಭಕ್ತಿಯಿಂದೆಲೌ, ತಾಯೆ, ಶಾರದೆಯೆ, ನೀ-
ನೆನ್ನ ನಾಲಗೆದುದಿಯೊಳಾವಗಂ ಲೀಲೆಯಿಂ
ನರ್ತನಂಗೈದು ಹರಸೌ; ಮಹಾಕಾವ್ಯ ಹೃ-
ತ್ಸರಸಿಯಲ್ಲರಳಿ ಘಮಘಮಿಪ ಕಮಲಿನಿಯ ತುಟಿ
ಜೇನಿನಿನಿಹನಿಯ ನೀಂಟುವ ತುಂಬಿಯಪ್ಪಂತೆ-
ಕೃಪೆಗೈಯ್ಯೆ, ಹೇ ದೇವಿ, ಸಂತಸದ ಸರಿಯ ಸುರಿಸಿ!
ಕವಿಯ ಕೀರ್ತಿಯ ಕಂಡು ಸುರಪತಿಯು ಮರುಳಾದ
ದೇವಾಧಿ ದೇವತೆಗಳೆಲ್ಲರುಂ ಮೂಕ ವಿ-
ಸ್ಮಿತರಪ್ಪರೌ, ಮಾಯೆ, ನಿನ್ನ ನುಡಿಗೆನಿತದ್ಭು-
ತಂ ಶಕ್ತಿ! ದಯೆಗೈಯ್ಯೆ, ಓ! ದೇವಕವಿ ವಂದ್ಯೆಯೇ!
*****
ಬೆಂಗಳೂರು : ೧೯೪೨
