ದುಂದುಮೆ ಕೇಳ್ರಿ ದುಂದುಮೆ ||ಪ||
ದುಂದುಮೆ ಎಂತೆಂದು ಪಾಡಿರಿ ಜನರು
ದುಂದುಮೆ ಬಸವಂತನ ಹಬ್ಬ | ದುಂದುಮೆ |
ದುಂದುಮೆ ನಿರ್ದುಮೆ ಸಾಲಗನ್ನಿರೆ |
ದುಂದುಮೆ ಕೇಳ್ರಿ ದುಂದುಮೆ ||ಅ. ಪ||
ಸಬ್ಬ ದೇಶದೊಳು ಇಂಥ ಹೆಚ್ಚಿನ ಮರ್ಕಟ
ಅಬ್ಬರಿಸುತ್ತ ಹಾರ್ಯಾಡುವವು | ತಮ್ಮ
ಹುಬ್ಬು ಹಾರಿಸಿ ಹಲ್ಲು ಕಿಸಿಯುವವು | ಮತ್ತ
ತಬ್ಬುಬ್ಬಿ ಎಲೆಯಲ್ಲಿ ಕೂಡುವವು | ಮೈಯ ||
ಉಬ್ಬುತ ಕೊಬ್ಬುತ ಹಬ್ಬುತ ಒಳಗೆಲ್ಲ
ಹುಬ್ಬಳ್ಳಿಯೊಳು ಮಂಗ ಹುಡದಿಯಾಡಿದವು || ದುಂ ೧
ಅಂಗನೆಯರು ತಮ್ಮ ಅಂಗಳದೊಳು ಮನಿ
ಮುಂಗಡಿಯೊಳಗೆಲ್ಲ ಕೂಡಿದವು | ಮತ್ತೆ
ಹಿಂಗದೆ ಒಳಪೊಕ್ಕು ನೋಡಿದವು | ದೊಡ್ಡ
ಸಂಗಟಿಸ್ವಾರಿ ಈಡಾಡಿದವು | ಇಟ್ಟ ||
ಗಂಗಳ ತಂಬಿಗಿ ಆಂಬ್ರ ಚೆಲ್ಲಿದವವ್ವಾ
ಮಂಗಳವಾರ ಪ್ಯಾಟಿ ಮಾನಗೇಡಿ ಮಂಗ || ದುಂ ೨
ದೊಡ್ಡ ಮುಂಡಾಸ ಗಿಡ್ಡಂಗಿ ಜನಿವಾರ
ದೊಡ್ಡೆ ಗೊಂಗಡಿಯನ್ನು ಹಾಸಿಯರು | ಸಣ್ಣ
ಗಡ್ಡ ಹತ್ತಿ ಮೀಸಿ ಚಿನಿವಾಲರು | ಮುಂದೆ
ಅಡ್ಡ ಹಾಯ್ದರೆ ನೋಡಿ ಕರೆಯುವರು | ಹೊನ್ನು ||
ದುಡ್ಡು ರೂಪಾಯಿ ಚೀಲ ಅಡ್ಡಡ್ಡ ಎಳಿದಾಡಿ
ಎಡ್ಡು ಹಚ್ಚಿತಲ್ಲೊ ಅಡಮುಟ್ಟ ಮಂಗ|| ದುಂ ೩
ಹಪ್ಪಳ ಸಾಂವಿಗಿ ಸೆಂಡಿಗಿ ಗುಳಗಿಯ
ಚಪ್ಪರ ಮುಂದೊಣ ಹಾಕಿಹಳು | ಒಂದು
ತುಪ್ಪದ ಚಟಿಕೀಯ ಮುಂದಿಟ್ಟಹಳು । ಕೈಯ
ಚೆಪ್ಪಳಿಕ್ಕುತ ಮಾತನಾಡುವಳು | ನೋಡಿ ||
ತಪ್ಪದೆ ಹೊಕ್ಕೆಲ್ಲೊ ತಿಂದು ತಕ್ಕಿಯ ಬಿದ್ದು
ಕುಪ್ಪಸ ಹರಿದಿತು ಕುಲಗೇಡಿ ಮಂಗ ದುಂ ೪
ಪಂಚಮಿ ಬಂತೆಂದು ಹಂಚಿ ಬಿಟ್ಟಳ್ಳನು
ಹಂಚಿಕೆಯಿಂದ್ಹುರಿದಿಟ್ಟಿದ್ದೆನೆ | ಆಗ
ಮುಂಚೆ ಎಳ್ಳಚಿಗಳಿ ತಂಬಿಟ್ಟು ಕಟ್ಟಿದ್ದೆನೆ | ಹೊಸ
ಕುಂಚಿಗಿ ಟೊಪ್ಪಿಗಿ ಹೊಲಿಸಿಟ್ಟಿದ್ದೆನೆ | ಮನಿಯ
ಹಂಚು ಒಡೆದೊಳಗ್ಹೊಕ್ಕೆಲ್ಲ ತಿಂದಿತು
ಕಂಚಕಾರೋಂಣಿ ಕಸವಂಟ ಮಂಗ ದುಂ ೫
ಅಚ್ಚಬಾಳಿಯ ಹಣ್ಣು ಬಟ್ಟಿಟ್ಟು ಗಲ್ಲಕೆ
ಹಚ್ಚಿತು ಕೈಯನು ಮುಂಬಿನಲಿ | ಅದು
ತಬ್ಬಿಕೊಂಡೋಡಿತು ಕುಂಬಿಯಲಿ | ಕೂತು
ಬಿಚ್ಚಿತೆೊ ತೋವಿಯ ಕೈಯಿಂದಲಿ | ಬಾಯ್ಗೆ ॥
ಹಚ್ಚಿತೆನ್ನಯ ಜೀವ ಕಿಚ್ಚೆದ್ದು ಹೊಯ್ಕೊಂಡೆ
ಹೆಚ್ಚೆಂದು ಕಾಣವ್ವ ಹಿರಿಪ್ಯಾಟಿ ಮಂಗ ದುಂ ೬
ನಲ್ಲೆರ ಕೈಯಾನ ರಾಟಿಯ ಒಳಗಿನ
ಚಿಲ್ಲನು ಕತ್ತು ಈಡಾಡಿತಲ್ಲ | ಬುಟ್ಟಿ
ಯಲ್ಲಿದ್ದ ಕುಕ್ಕಡಿ ಹರದೀತಲ್ಲ ! ಹಾಸುಗ್ಹಾರಿ
ಹಲ್ಲಿಂದ ಹರಿದೋಡಿತಲ | ಮತ್ತು ||
ಹಲ್ಲಿಟ್ಟು ಹಣ್ಣುಕಾಯಿ ನೀರಲ ಪೇರಲ
ಪಲ್ಲೇವ ತಿಂದಿತು ಪಡನೆಂಟಿ ಮಂಗ ದುಂ ೭
ಬುಟ್ಟೇದ ಕುಪ್ಪಸ ಬುಗುಡಿ ಅಂಚಿನ ಸೀರಿ
ಉಟ್ಟು ತೊಟಗೊಂಡಿರುತಿದ್ದೆನೆ | ಅಕ್ಕಿ
ಕುಟ್ಟಿಕೊಂತ ನಾ ಕುಂತಿದ್ದೆನೆ | ಒಂದು
ಕಟ್ಟಿಗಿ ಕೋಲನ್ನು ಇಟ್ಟಿದ್ದೆನೆ | ಬಂದು ||
ಬಟ್ಟ ಕುಚವ ಮುಟ್ಟಿ ಕಟ್ಟನೆ ಕಡದೀತು
ಕಟ್ಟಾಣಿ ಹರದೀತು ಕವಡಿಯ ಮಂಗ ದುಂ ೮
ಬುಕ್ಕಿಟ್ಟಿನ ಚೀಲ ಬುಡಮೇಲ ಮಾಡಿತು
ಚಿಕ್ಕ ತಕ್ಕಂಗಡಿ ಹೊಕ್ಕಿತಲ್ಲ | ಕಲ್ಲ-
ಸಕ್ಕರೆ ಚೀಲವ ನೆಕ್ಕಿತಲ್ಲ | ಮತ್ತೆ
ತಕ್ಕಡಿ ದಂಡಿಗಿ ಮುರದಿತಲ್ಲ । ಅವ- ||
ಲಕ್ಕಿ ರೇವಡಿ ಬೆಂಡು ಬೆತ್ತನ ಪುಟಾಣಿ
ಮಕ್ಕಳ ಕಸಕೊಂಡು ಮುಕ್ಕಿತು ಮಂಗ ದುಂ ೯
ಪೆಟ್ಟಿಗಿಯೊಳಗಿನ ವಟ್ಟೆದಂಚಿನ ಸೀರಿ
ಇಟ್ಟು ಬಚ್ಚಲದಾಗ ಕುಂತಿದ್ದೆನೆ | ಎನ್ನ
ಕಟ್ಟಿದ ಕೂದಲ ಬಿಚ್ಚಿದ್ದೆನೆ | ಮತ್ತೆ
ಬಟ್ಟ ಬತ್ತಲೆ ನಾನು ಕೂತಿದ್ದೆನೆ | ಆಗ ||
ತಟ್ಟಿ ಮುರಿದು ಬಂದು ಇಟ್ಟಿಸೀರಿಯ ಕೊಂಡ
ಕಟ್ಟು ಕುಲಾಯವ ಸಕಸಿಕೊಂತು ಮಂಗ ದುಂ ೧೦
ಬಗ್ಗನೆ ಹೊಕ್ಕಿತು ಮಗ್ಗದವರ ಮನಿಯ
ಹುಗ್ಗಿಯ ಗಡಿಗಿಗೆ ಹಾರಿತಲ್ಲ | ಅದು
ಬಗ್ಗಿಸಿ ಬಾರಲ್ಹಾಕಿತಲ್ಲ | ಬಲು
ಸುಗ್ಗಿಯಾಯಿತೆಂದು ಹಿಗ್ಗಿತಲ್ಲ | ಕುಂತು ||
ಬಗ್ಗಿದವರ ಮೇಲೆ ಹಗ್ಗ ಹರಿದಿಳಿದು
ನುಗ್ಗ ಮಾಡಿತವ್ವ ಅಗ್ಗದ ಮಂಗ ದುಂ ೧೧
ಹಾರಿತು ಜವಳಿಯ ಅಂಗಡಿ ಸಾಲಿಗೆ
ಬಾರಲ್ಹಾಕಿತು ಮಸಿದೌತಿಯನು | ಕಿತ್ತು
ಈಡಾಡಿತೆಲ್ಲ ಜವಳಿಯನು | ಮಣಿ
ಗಾರಂಗಡಿಗಿಟ್ಟು ದಾಳಿಯನು | ವಟ್ಟೆ ||
ಮಾರುನಾರೇರ ಮಾರಿಯ ಮೇಲ್ಹೊಡೆದು
ನೀರಿಯ ಕಳೆದಿತು ಸಿರಿಗೇಡಿ ಮಂಗ ದುಂ ೧೨
ಮತ್ತೆನಾ ಬಸುರೆಂದು ಬುತ್ತಿಬೋನ್ಹದ ಮಾಡಿ
ಒತ್ತಿ ಒಳೊಳ್ಳಿ ಹರಿಸಿದ್ದೆನೆ | ಆಗ
ಚಿತ್ತೆಲ್ಲ ನಾನಲ್ಲಿ ಇರಿಸಿದ್ದೆನೆ | ನನ್ನ
ಸುತ್ತಲೆ ಯಾರಿಲ್ಲ ಕುಳಿತಿದ್ದೆನೆ | ಒಳ್ಳೆ ||
ಹೊತ್ತು ನೋಡಿ ಬಂದು ಮುತ್ತಿಕೊಂಡಿತೊಂದು-
ತುತ್ತಾರ ಬಿಡಲಿಲ್ಲ ತುಡಗಿನ ಮಂಗ ದುಂ ೧೩
ಹುಡಗೇರೆಲ್ಲರು ಕೂಡಿ ಕಡಲಿ ಕೊಬ್ಬರಿ ಕಬ್ಬು
ಹಿಡಕೊಂಡು ಹೋಗಲು ತುಡಕಿತವ್ವ | ಗಲ್ಲ
ಹಿಡಿದೆನ್ನ ಮಾರಿಯ ನೋಡಿತವ್ವ | ಉಟ್ರ
ಸಡಿಲಿಸಿ ನಿರಿಗೆಗಳ ಕಳಚಿತವ | ದೊಡ್ಡ ||
ಕಡುವನಂತ ಮೂಳ ಕಾಲಾಗ ಬಂದಿತು
ಉಡಿಯ ಚೆಲ್ಲಿಕೊಂಡು ಓಡಿತ ಮಂಗ ದುಂ ೧೪
ಲೋಕದೊಳೆಲ್ಲೆಲ್ಲ ನಾಕಾಣೆನಿಂತ್ಹಾದು
ಸಾಕು ಸಾಕಾದೀತು ಜನ್ಮಕೀಗ | ಇದರ
ಕಟಕಟಿ ಬಹಳವ್ವ ಅದರುಷ್ಟಕ | ಬೆಂಕಿ
ಹಚ್ಚಲೆವ್ವ ಮಾಡುವ ಬಾಳುವಿಗೆ | ಮುದದಿ ||
ಶ್ರೀ ಕುಂದಗೋಳ ಭೂಕಾಂತ ಗುರುವಿಗೆ ನಾನು
ಕಾಯ ಒಡೆದೇನಿ ಸಾಯಲಿ ಮಂಗ ದುಂ ೧೫
*****
