ಎಲ್ಲಾ ಕನಸುಗಳ ದಾಟಿ
ಕಣ್ಣ ಕಾಡಿಗೆ ತೀಡಿದೆ,
ಮದರಂಗಿ ಅರಳಿದೆ ಕೈಯಲಿ,
ಮಾಯೆ ಎದೆಯೊಳಗೆ ಇಳಿದಿದೆ,
ಇಲ್ಲಿ ಅರಳುವ ಹೂಮನ ಎಲ್ಲೆಲ್ಲೂ ಘಮಘಮ.
ಅಂತರ ದೃಷ್ಠಿಯ ಅಂತರದಲಿ
ಸರಿದಾಗ ಆಳ ನಿರಾಳ ಕಣ್ಣೋಟಗಳು,
ಬಿಂಬಿಸಿವೆ ಕಾಮನ ಬಿಲ್ಲಿನ ಬಣ್ಣ
ಸಮಸಮ ಅಮಲು ಏರಿದ ರಸಕಾವ್ಯ.
ಪುಟ್ಟ ಪಾದಗಳ ಮೇಲೆ ಇಟ್ಟ
ದೊಡ್ಡ ಹೆಜ್ಜೆಗಳ ಸಪ್ತಪದ.
ಸಪ್ತರ್ಷಿ ಮಂಡಲದಲಿ ಮಿಂಚಿದ
ಅರುಂಧತಿ ಘಮ್ಮೆಂದು ಸೂಸಿದ ಪರಿಮಳ.
ಬಿಂದು ಸಿಂಧುವಿನ ಒಲವಿನ
ನದಿ ಹರಿದು ಎದೆಯ ಆಳಕೆ
ಅಪ್ಪಳಿಸಿತು ಪ್ರೀತಿ ದಾಂಪತ್ಯದಲೆಗಳು
ಆನುತಾನು ನಿತ್ಯ ನಿರಂತರ ಚಿರನೂತನ.
*****
