ಇನ್ನಾದರೂ ಎಚ್ಚರು
ಓ ನನ್ನ ರಾಜಕುವರ! || ಪ ||
ಕಾಲಮೀರಿಹುದೆಂಬ
ಸೋಲಿಗೀಯದಿರಿಂಬ
ನಿಮಿನಿಮಿಷವಾಗಿರಲು
ಅಮೃತರಸದಾ ಹೊನಲು. ೧
ಅರಿವನರುಹಿರೆ ಮೊಗವು
ಮರಣದಂತಹ ಮರವು
ಕರೆದಂತೆ ಮನಬೆರೆತು
ಒರಗಿರುವೆ ಮೈಮರೆತು. ೨
ಎಂಥ ಕುದುರೆಯನೇರಿ
ಪಂಥದಲಿ ಕಾಹೇರಿ
ಬೇಟಗೋಸುಗ ಬಂದೆ
ಬಿಲ್ಲುಬಾಣವ ತಂದೆ. ೩
ನೆಲದ ಸಿರಿ ಸೊಗಸೆಲ್ಲ
ನನ್ನದೆನ್ನುವ ಸೊಲ್ಲ
ನುಡಿವ ನೋಟವ ಬೀರಿ
ನಡೆದೆ ನೀ ಮಿತಿಮೀರಿ. ೪
ಹಕ್ಕಿ ಹರಣವ ಕೊಂಡೆ
ಹಿಗ್ಗಿನೂಟವನುಂಡೆ
ಚಿಗರೆಕಣ್ಗಳ ಸೆರೆಗೆ
ನೆಗೆದೆ ನೀನೆದೆ ಕರಗೆ. ೫
ಬೇಟೆಯಾಡಲು ಬಯಸಿ
ಬಿಲ್ಲೆ ಬಾಣವನಿರಿಸಿ
ಮೃಗವ ಗುರಿಗೊಂಡಂತೆ
ಮೃಗಕಾದೆ ಗುರಿಯಂತೆ. ೬
ಬೇಟೆಗಾರನು ಹೋಗಿ
ಬೇಟಬಲೆಗೊಳಗಾಗಿ
ಸಿರಿಯ ಸೋಗಿನ ಹಿರಿದು
ಮರೆಮೋಸವನೆ ಮರೆದು- ೭
ಕಾಡಿನಲಿ ಧುಮುಕಿದೆ
ಮೇಡಿನಲಿ ದುಡುಕಿದೆ
ಬೇಕುಬೇಕೆಂದುಸುರಿ
ನೂಕುನುಗ್ಗೆಂದೊದರಿ. ೮
ಮನೆಮಾರುಗಳ ತೊರೆದು
ಜನಜಾತ್ರೆಯನು ಜರೆದು
ಸಾಸದಲಿ ಮನನೆಟ್ಟು
ಕಾಡುಪಾಲಾದೆ ಕೆಟ್ಟು. ೯
ಕತ್ತಲೆಯ ತವರಾಗಿ
ಎತ್ತಲೂ ತೊಡಕಾಗಿ
ಬೆಳೆದ ಕಾರಡವಿಯೊಳು
ಸುಳಿದೆ ನೀ ತಿಳಿಯಲು. ೧೦
ಅಲೆದು ತಂದಿಹ ಸರುವ
ಮೋಲಜಿಂಕೆ ಗಿಳಿಗೊರವ-
ಬೇಟೆಯಲಿ ಮುಚ್ಚಿಹುದು
ಕುದುರೆಮೈ ಹೆಚ್ಚಿಹುದು. ೧೧
ಮುಂದೇನು ಎನ್ನೊಡೆಯ
ಎಂದೆಂಬ ಕಣ್ಕಡೆಯ
ಕೆಳಬೀರಿ ಕಳವಳದಿ
ದೊರೆಯಲಾರದ ಹಾದಿ- ೧೨
ನಿಂದಿರಲು ಆ ಕುದುರೆ
ಮೈ ನವಿರು ತಾನದುರೆ
ಕೆಡೆದಿತ್ತೊ ನೆಲದೆಡೆಗೆ
ಮಡಿದಿತ್ತೊ ಆಕಡೆಗೆ. ೧೩
ಮಡಿದ ಕುದುರೆಯ ಮೇಲೆ
ನಿನ್ನ ಮೈಯದು ಜೋಲೆ
ಸಾಸ ಕೆಳಗುರುಳಿದೊಲು
ಗಾಸಿಯದು ಸುರುಳಿದೊಲು- ೧೪
ಜಿಯ್ಗುಡುವ ಕಾಡಿನಲಿ
ಒಯ್ಯನುರುಳಿದೆ ಒರಲಿ
ತಣಿಯಲಾರದೆ ದಣಿದು
ಮಣಿಯಲಾರದಎ ಮಣಿದು. ೧೫
ಬಿಲ್ಲು ಬಿದ್ದಿರಲಿದಿರು
ಒಲ್ಲೆನೆನ್ನುವ ಚದುರು
ಬಣವೆದೆ ಸೇರಿಹುದು
ಕಾಣದೊಳಗೂರಿಹುದು. ೧೬
ನೆಲದೊಡೆಯ ಮೇಲೊರಗಿ
ಕಲ್ಲುಮಣ್ಣೊಳು ಬೆರೆತು
ಜಡಕಿಂತ ಜಡವಾದೆ
ತೃಣಕಿಂತ ಕಡೆಯಾದೆ. ೧೭
ಕೊರಗಿನಲಿ ಕೊನರಿಹುದು
ಬರಡಿನಲಿ ಹಯನಿಹುದು
ಮರವಿನಾ ಮರೆಯಲ್ಲಿ
ಅರಿವಿನಾ ತೊರೆ ಅಲ್ಲಿ. ೧೮
ಗಾಳಿಗೊಳಲೆಲ್ಲೆಡೆಗೆ
ಕೇಳುವೊಲು ಕೇಳ್ವವಗೆ
ಸಾರುತಿದೆ ಸವಿಯಲೆಯ
ಮೇಲೆ ಬಾಳಿನ ಕಲೆಯ. ೧೯
ಕನಸು ನಾಡಿನೊಳಲೆತು
ನನಸು ಕಂಡಿಹ ಗುರುತು
ತುಟಿಯ ನಸುನಗೆಯಲ್ಲಿ
ಮಿನುಮಿನುಗುತಿದೆ ಅಲ್ಲಿ. ೨೦
ನಿಜಸುಖದ ನೆಲೆಯರಿತು
ಬದುಕಿದಾಕ್ಷಣವನಿತು
ಕೋಟಿಯುಗ ಕಳೆದಿರೆಯು
ನಿತ್ಯನವ ನಸುಕುಹರೆಯು. ೨೧
*****
