ಕಾಮ

ಕಣ್ಸೆಳೆವ ರೂಪು; ಕಿವಿ ಸೆಳೆವ ಸವಿಗೊರಲ ದನಿ;
ಲಯವೆ ಅಡಿಯಿಡುವವೊಲು ಎಳನವಿಲ ಬಳುಕು ನಡೆ;
ಅದರೊಡನೆ ಅತ್ತಿತ್ತ ಒಲೆಯುತಿಹೆ ಉದ್ದ ಜಡೆ;
ಹಣೆ, ಹುಬ್ಬು, ಕಣ್ಣು, ಗಲ್ಲ, ಕೆನ್ನೆ-ಬರಿ ಚೆಲುವ ಬನಿ!
ಚೀಪಿ, ಚುಂಬಿಸಿ, ಕಚ್ಚಿ ಚಪ್ಪರಿಸುತೆಡೆಗೊಡದೆ
ಹೀರಿದನಿತೂ ಒಂದೆ ಸಮನೆ ಸೊದೆ ಸುರಿವ ತುಟಿ;
ನಸುಗೆಂಪು-ಕಪ್ಪು ಕೊಕ್ಕಿನ, ಅಚ್ಚ ಬಿಳಿಯ ಸುಟಿ-
ಯಾದೆರಡು ಪಾರಿವಾಳದ ಮರಿಗಳಂದದೆದೆ!-
“ಸಾಕು! ನಿಲ್ಲಿಸು ನಿನ್ನ ಉನ್ಮತ್ತ, ಕಾಮುಕತೆ
ಜಿನುಗುವೀ ಬಣ್ಣನೆಯ! ಕಾಮವುಳಿ; ಪ್ರೇಮವಿಡು”
ಎನ್ನುವೆಯ? ಪೆಚ್ಚ! ನಿನ್ನೊಲವ ಕೊಂಡೊಯ್ದು ಸುಡು!
ಕಾಮಕ್ಕೆ ಪ್ರೇಮವೊರೆವಂತೆ, ಭಯ, ನಿದ್ರೆ, ಹಸಿವ ಚಿತೆ-
ಗಳಿಗೆಲ್ಲ ಏಕೊರೆಯೆ? ಬಿಚ್ಚದಿರು ನಿನ್ನ ಕಂತೆ!
ಪ್ರೇಮಗೀಮಗಳೆಲ್ಲ ಬರಿಯ ಸುಳ್ಳುಗಳ ಸಂತೆ!
*****