ಬಹಳ ದಿನದ ಬಾಯಾರಿಕೆ

೧
ಬಹಳ ದಿನದ ಬಾಯಾರಿಕೆ
ಯಾವ ನೀರ ಕುಡಿಯಲಿ?
ಸಹನೆಯ ಸವಿ ಬಲು ದೂರಕೆ
ಹಾರಿತೇನು ಮಾಡಲಿ?

೨
ಅವರಿವರೆದೆಗಾವಿಗೆ ನಾ
ಮನ ತೆತ್ತೆನು ಮರುಳ
ಹವಣಿಸುವರ ಹವಣಿಕೆಗತಿ
ದಿನಗಳೆದನು ದುರುಳ

೩
ಕಾಂಬುದು ಬೆಳಕೆನ್ನುತೆ
ಇರುಳನೆ ಮರೆತಿರುವೆ
ತಿಂಬುದೆಸೊದೆ ಎಂದೆನ್ನುತೆ
ಕರುಳನೆ ಹಿಸುಕಿರುವೆ

೪
ಮೇಲೇರುತೆ ಮುಗಿಲಂಗಣ,
ತಿಂಗಳೆ ತವರಾಗಿ
ಕೋಲಾಟದ ನರ್ತಕ ಗಣ
ಚಂಗಳೆ ಚಲುವಾಗಿ

೫
ನಕ್ಷತ್ರವು ಪ್ರತ್ಯಕ್ಷದಿ
ಮಿನುಮಿನುಗುವ ತೆರದಿ
ವಕ್ಷಸ್ಥಲದಪರೋಕ್ಷದಿ
ಜನುಮದ ಕತೆ ಮುದದಿ!

೬
ಜೀವನ ಸಾಗುವ ವರೆಗಿನ
ಕಾಲವು ಬ್ರಹ್ಮಾಂಡ
ಜೀವಿಯ ಬಲು ಕಿರಿಬಾಳಿನ
ಸಾಲವು ಕರ್ಮಾಂಡ!

೭
ಬದುಕಿಗೆ ಭಯ; ಸೊಗಮಾವುದೊ?
ಅದೆ ಮರ್ಮದ ಮನೆಯು
ಎದೆಯಾಳದ ಸಿಹಿ ಎಲ್ಲಿರುವುದೊ?
ಅದು ತಿಳಿವಿನ ಕೊನೆಯು

೮
ನಿನ್ನಲ್ಲಿಗೆ ಬಹೆನೆಂದರೆ
ಆಯಸದಾವೇಗ
ಮುನ್ನೆಲ್ಲಿಗೆ? ಅದ ನೀ ಮರೆ
ಸಾಕೀ ಒಣ ವೇಗ

೯
ಎದೆವಾತಿಗೆ ದನಿ ಏರದು
ಕುಗ್ಗಿದೆ ಚಿಗುರದೊಲು
ವಿಧಿಯಾವುದೊ ಬಳಿ ಬಂದುದು
ಮುಗ್ಗಿತು ಮುರಿವೊವೊಲು

೧೦
ನಿನ್ನಡಿವರೆಗದೊ ಬಂದಿತು
ಹರಕೆಗೆ ಹಾರೈಸಿ
ತನ್ನಯ ಮ್ಬೆ ಮನದುಂಬಿತು
ಹಿರಿಮೆಗೆ ಕೋರೈಸಿ

೧೧
ಎನಿತಾದರೂ ನಲ್ಮೆಯದಿರೆ
ಕಲ್ಲೇ ಮಲ್ಲಿಗೆಯು
ಜನಜನಿತವು, ಅದರುಸಿರಿರೆ
ಇಲ್ಲೇ ನಂದನವು

೧೨
ಬಹಳ ದಿನದ ಬಾಯಾರಿಕೆ
ಯಾವ ನೀರ ಕುಡಿಯಲಿ?
ಸಹನೆಯ ಸವಿ ಬಲುದೂರಕೆ
ಹಾರಿತೇನು ಮಾಡಲಿ?
*****
ಬೆಂಗಳೂರು : ೧೯೪೬