ಪ್ರತೀಕ್ಷೆ

ಮರುಕಕ್ಕೆ ಪ್ರೇಮಕ್ಕೆ ಮುಚ್ಚಿದೆ ಬಾಗಿಲು
ಗಾಳಿ ಆಡದ ಕೋಣೆ
ಬಿಟ್ಟ ಉಸಿರೇ ಮತ್ತೆ ಒಳಹೊಕ್ಕುವ
ಸರಾಗ ಸರೋಗ ವಾತಾಯನ ವ್ಯವಸ್ಥೆ
ಅನುತಾಪ ಅನುಕಂಪಕ್ಕೆ ಭದ್ರ ಬಂದೋಬಸ್ತ್ ಬೀಗ
ತೆರೆಯದ ಕಿಟಕಿಗಳೊಳಗೆ ಕೊಳೆಯುವ ರಾಜ ವೈಭೋಗ
ಶಿಣ್ಣು, ಬೇಡು, ಗಂಟೆಗಳ ಸಜೀವ ಆರ್ತನಾದ
ಒಳ್ಳೆಯ ಆಲಾಪ ಪ್ರಾಯೋಗಿಕ
ಕತೆ ಕವಿತೆ ಕಾದಂಬರಿಗಳಿಗೆ
ಕರುಳಬಳ್ಳಿಯ ಕತ್ತರಿಸಿದ ಪ್ರನಾಳ
ನಿರ್ನಾಳ ಶಿಶು ಪಶುಗಳಿಗೆ
ಕೃತಕ ಸುಂದರ ಹೂವುಗಳ ಇಲ್ಲದ ಪರಿಮಳ
ಸತ್ತ ಜೀವದ ಒಳಗೆ ಕುಪಿಸದ ಶ್ವಾಸ
ಅರೆ ಜೀವ ತೂಕಡಿಕೆ
ಜೀಕಳಿಕೆ

ಇಂಥಲ್ಲಿ
ನಿಂಥಲ್ಲೇ ಇನ್ನಿಲ್ಲವಾಗುವ ನಾನು
ನನ್ನ ಕೊಳೆಯುವ ಹೆಣ
ಆಗದ ಸಂಸ್ಕಾರ
ಮುಚ್ಚಿದ ಮೂಗುಗಳ ಒಳಗೂ
ದಾಳಿ ಇಡುವ ದುರ್ನಾತ
ಓಡೋಡಿ ಬರುವುವು ನಾಯಿ
ಕುಕ್ಕಲು ಹದ್ದು
ಎಲೆ ಇರದ ರೆಂಬೆಯ ಮೇಲೆ ಕಾಯುತ್ತಿದ್ದು
ಇದೋ ಈಗ
ನುಗ್ಗುವ ಫಟ ಫಟ ಸದ್ದು

ಆಗ ತಕ್ಷಣ ಎದ್ದು
ಬಡಿಯುವೆ ಬಾಗಿಲು
ತೆರೆಯದಿದ್ದರೆ ಒದ್ದೇ ಬಿಡುವೆ
ಇನ್ನೆಷ್ಟು ದಿನ ಇಲ್ಲಿ ಕಾಯುತ್ತಿರಲಿ?
ಪುನಃ ಪುನಃ ನಾನು ಸಾಯುತ್ತಿರಲಿ ?
*****