ಕಾಣುವ ಕಣ್ಣಿಗೆ ಎಲ್ಲಾ ಬೆರಗು

ಕಾಣುವ ಕಣ್ಣಿಗೆ ಎಲ್ಲಾ ಬೆರಗು
ಕಾಣುವ ಕಣ್ಣಿಗೆ ಎಲ್ಲೆಲ್ಲೂ ಸೊಬಗು

ದಿನ ದಿನ ಮೂಡುವ ನಸುಕಿನ ಬೆಳಕಿನ
ದಿನ ದಿನ ಮಾಯುವ ಸಂಜೆಯ ಥಳಕಿನ
ರಾತ್ರಿಯ ಭವ್ಯಾಕಾಶದ ಗಹನ
ಕೋಟಿ ದೀಪಗಳ ದೀಪಾರಾಧನ

ಮಳೆಬಿಸಿಲ ಬಾನಿನ ಕಾಮನ ಬಿಲ್ಲಿನ
ಹನಿಹನಿ ನೀರಿನ ಮುತ್ತಿನ ಸರಮಾಲೆ
ಈ ಹುಲ್ಲ ಮೇಲಿನ ಮಣಿಮೇಖಲೆ

ನವ್ವಾಲೆಗರಿಗಳ ಕ್ಷಣಕ್ಷಣ ಬಣ್ಣದ
ಕಣ್ಣಿನ ಪಚ್ಚೆಯ ನೀಲಿಯ ಕಪ್ಪಿನ
ಹೊಂಚುವ ಬೆಕ್ಕಿನ ಆಳದ ಕಣ್ಣಿನ
ವನ ಹೊತ್ತಿ ಉರಿವಂಥ ಬೆಂಕಿಯ ಜ್ವಾಲೆಯ

ನಳನಳಿಸುವ ಹೊಸ ಬಿಮ್ಮನಸಿ ಪೈರಿನ
ಕಲಕಲ ಹರಿಯುವ ತಿಳಿ ನೀರ ಗಾಜಿನ
ಘಮಘಮಿಸುವ ಸಂಜೆ ಮಲ್ಲಿಗೆ ದಂಡೆಯ
ಜಡೆಯಲ್ಲಾಡಿಸಿ ನಡೆಯುವ ಹೆಣ್ಣಿನ

ಕರುವಿಗೆ ಹಾಲೊಸೆವ ಹಸುವಿನ ಒಲವಿನ
ಮಗುವಿಗೆ ಊಡುವ ಮಾತೆಯ ಮಮತೆಯ
ನಲ್ಲನಲ್ಲೆಯರ ಮಾತಿನ ಪ್ರೀತಿಯ
ಪ್ರೇಮಕಾಮಗಳ ಶತಕೋಟಿ ರೀತಿಯ
*****