ಹೇಳಿರೇ ಕೆಳದಿಯರೇ
ಕನಸ ಕಂಡಿರೇನೆ
ರಾಮನ
ಇಲ್ಲ ರಾಜಕುಮಾರನ
ಎದೆಯಲ್ಲಿ ಕನಸಿನ
ಬೀಜಗಳ ಒತ್ತಾಗಿ ಬಿತ್ತಿ
ಒಡೆತನವ ಸಾಧಿಸಿದಿರೇನೆ?
ಎಚ್ಚರಿಕೆಯಿಂದ ದಾರಿಯಲಿ
ಪರೀಕ್ಷಿಸಿ ಹೆಜ್ಜೆ ಇಟ್ಟರೂ
ಚುಚ್ಚುವ ಸಾವಿರಾರು ಮುಳ್ಳುಗಳು
ನೋವು ಯಾತನೆಗಳಿಗೆ
ಸ್ತ್ರೀ ಧರ್ಮದ ಮುಸುಕು
ಎಗ್ಗಿಲ್ಲದೇ ಎಳೆದಿರೇನೆ?
ಹೆಜ್ಜೆ ಹಾಕಿದಲ್ಲಿ ಸೋರುವ
ಕೀವು ರಕ್ತಗಳನ್ನು ಒರೆಸುತ್ತ
ಅವ್ವನಾದರ್ಶದ ಸೆರಗು ಹೊದ್ದು
ಉಸಿರಾಡುವ ಯಂತ್ರವಾದಿರೇನೆ?
ಆದರ್ಶದ ಕೈಪಿಡಿಗಳಾಗಿ
ಯಜಮಾನರ ಮರ್ಜಿ ಹಿಡಿದು
ದಾಸಿಯಂತೆ ದುಡಿದಿದ್ದಕ್ಕೆ ಕೊನೆಗೆ
ಗರತಿಯ ಪಟ್ಟ ದಕ್ಕಿತೇನೆ?
*****
