ಅಲೆ ಆಟ

ಬಾಳಿನಲ್ಲಿ ಅನೇಕ ಅಡಚಣೆಗಳು ಬಂದು ಬೇಸತ್ತ ಓರ್ವ ಯುವಕ ಸಮುದ್ರ ದಡಕ್ಕೆ ಬಂದು ಕುಳಿತ. ಮನದಲ್ಲಿ ಬಹಳಷ್ಟು ಬೇಸರ, ದುಃಖ, ನೋವು ಇತ್ತು. ಹಾಗೇ ಅಲೆಗಳನ್ನು ನೋಡುತ್ತ ಇದ್ದ. ಮನಸ್ಸು ಹೇಳಿತು-

‘ಸಮುದ್ರ ಸ್ನಾನ ಮಾಡು ನಿನ್ನಲ್ಲಿರುವ ಜಡತ್ವವನ್ನು ತೊರೆ ಹೊಸ ಉತ್ಸಾಹ ಪಡೆ’ ಎಂದು.

ಯುವಕ ಹೇಳಿದ- “ಮನವೇ! ನನ್ನ ಸಮುದ್ರಕ್ಕೆ ನೂಕಬೇಡ, ಈಗಲೇ ನಾನು ಚಿಂತೆಯಲ್ಲಿ ಮುಳಗಿ ಹೋಗಿದ್ದೇನೆ. ಅಲೆಗಳು ಮೇಲೆ ಏಳುವುದು ನಿಲ್ಲಲಿ ನಂತರ ಸಮುದ್ರ ಸ್ನಾನ ಮಾಡುವೆ,” ಅಲೆ ಏಳುತ್ತಿತ್ತು, ಬೀಳುತಿತ್ತು ಅನವರತ. ಯುವಕ ಅಲೆಗಳನ್ನು ಎಣಿಸುತ್ತಲೇ ಇದ್ದ. ಮನವು ಮತ್ತೆ ಹೇಳಿತು

“ಅಲೆ ಎಂದಾದರೂ ನಿಲ್ಲುವುದೇ? ಜೀವನದಲ್ಲಿ ಜಂಝಟಿಗಳು ಹಾಗೇ ಬರತ್ತಲೇ ಇರುತ್ತವೆ. ಸಮುದ್ರದಲ್ಲಿ ಮುಳಗಿದಾಗ ಅಲೆ ತಲೆಯ ಮೇಲಿಂದ ಹಾದುಹೋಗುತ್ತದೆ. ಸಾಧಕನಾದವನು ಅಲೆಯ ಮೇಲೆ ಏರಿದರು ಅದು ದಡಕ್ಕೆ ತಂದು ಹಾಕುತ್ತದೆ. ಅಲೆಯೊಡನೆ ಅಸ್ವೀಕಾರಬೇಡ. ಸಮಸ್ಯೆಯ ಅಲೆ ನಿಲ್ಲಲಾರದು. ಅಲೆಯ ಬೆಲೆ ಸಾಧಕನಿಗೆ ಗೊತ್ತು. ಅಲೆಯ ನೆಲೆ ಜೀವನದ ಗುಟ್ಟು, ಅಲೆಯ ಜಯಿಸುವುದೇ ಜೀವನ ಕಲೆ” ಎಂಬ ಮನದ ಮಂಥನ ಯುವಕನನ್ನು ಎಚ್ಚರಿಸಿತು.
*****