ಇನಿಯಳ ಮುನಿಸಿನ ಅರ್ಥವ ಜಗದಲಿ ಹೇಳುವರಾರುಂಟು?
ಕನಲಿದರೇನು? ಇನಿಯಳ ಹೃದಯದಿ ಪ್ರೀತಿಯ ಸೆಲೆಯುಂಟು
ಸಿಡಿಲಿನ ಗುಡುಗಿಗೆ ನಡುಗದ ಕ್ಷೇತ್ರವು ದೊರಕುವುದಿನ್ನೆಲ್ಲಿ?
ಸಿಡಿಲಿನ ಒಡಲೊಳಗಿ೦ದಲೆ ಹರಿವುದು ತಣಿಸುವ ಜಲವಲ್ಲಿ
ಮನಸಿನ ಆಳವನಳೆದವರುಂಟೆ ಎಲ್ಲರು ಮುಳುಗಿಹರು
ಕನಸಿನ ಕೈಲಾಸಕೆ ಹೊರಟವರು ಮತ್ತೆ ಮರಳಿ ಬಹರು
ತೆರೆತೆರೆದಂತೆಯೆ ತೆರೆಯುವ ಮನಸಿಗೆ ತೆರೆಗಳು ಬಹಳುಂಟು
ತೆರೆಯುವ ಹದವೂ, ಅರಿಯುವ ಹವಣೂ ತಾಳ್ಮೆಯು ಇಡುಗಂಟು
ಇನಿಯಳ ಮುನಿಸಿನ ಮೋಡಕೆ ನಲ್ಲನ ನಲ್ಮೆ ಕಿರಣ ಸೋ೦ಕೆ
ಹನಿಸುವ ಮಾನಸ ಸರವಿಹುದಲ್ಲೆ, ಇಲ್ಲ ಎನಗೆ ಶಂಕೆ!
ಪ್ರೀತಿ ಮುನಿಸುಗಳಿಗಂತರ ಉಂಟೇ, ಒಂದರ ಬೆನ್ನೊಂದು!
ರೀತಿಯು ಬಿಟ್ಟರು ನೀತಿಯು ಬಿಡದು, ಇರುವವೆರಡು ಒಂದು!
*****
