೧
ಅಂದು ಮಾರುವ ಕಟ್ಟೆಯೊಳು ನಾನು ಗೊತ್ತುಗುರಿ-
ಯಿಲ್ಲದೊಲು ತಿರುಗುತಿರೆ, ಕಂಡೆನಲ ನಾನೊಬ್ಬ
ಮನುಜ ಮಾರುತಲಿಹುದ ರಾಸಿ ಒಣಕಲು ಕಬ್ಬ!
ಗಾಣದೊಳು ಹಿಂಡಿದರು ಕಾಲೊಳೊತ್ತಿದರು ಕರಿ
ರಸದ ಸುಳಿವಿಲ್ಲದಿಹ ಕಬ್ಬಿನಂದದ ಬೊಂಬು!
ಭದ್ರಾವತಿಯಲಿರುವ ಆಲೆಮನೆಗಳ ತಂಡ
ಕಾ ಚಣವೆ ಮನ ಹಾರಿ, ಬಿಸಿಯ ಬೆಲ್ಲದ ತುಂಡ
ಚಪ್ಪರಿಸಿ, ಗಾತ್ರದೊಳು ಕೊಡವನಣಕಿಪ ಚೊಂಬು
ತುಂಬಿಕೊಂಡಿಹ ಮಧುರ ರಸವನಾಗಲೆ ಈಂಟಿ
ಕೊಪ್ಪರಿಗೆಯೊಳು ಕುದಿವ ರಸದ ಮಡುವಿನ ಗಂಧ-
ವನು ಮೂಸಿ, ಹಿಂದಿರುಗಿತಾ ಚಣವೆ ಕನಸಿಂದ-
ರಸಹೀನಮಾದೊಡಂ ಸ್ಪಪ್ನಲೋಕಕೆ ದಾಂಟಿ
ಪೋಗಲನುಕೂಲಿಸುತ ರಸವುಕ್ಕಿಸಿದ ಇಕ್ಷು!
ನಾ ಋಣಿಯು! ಆ ಕನಸ ಮತ್ತೆ ಕಾಣದು ಚಕ್ಷು!
೨
ಮೇಲೆ ನಭವನನು ಭರದಿ ಕರಿಯ ದೆವ್ವದವೋಲು
ಕಾರ್ಮುಗಿಲು ದೆಸೆದೆಸೆಗು ಕೈ ಚಾಚಿ ತಬ್ಬುತಿದೆ.
ತಿರೆಯೊಳೋ ಎಲ್ಲಿ ನೋಡಿದರಲ್ಲಿ ಹಬ್ಬುತಿದೆ
ಕಾರಿರುಳು, ಮೇಲಿರುವ ಕಾರ್ಮುಗಿಲ ನೆರಳಿನೊಲು!
ಕಪ್ಪನೆಯ ಗಾಜಿನೊಳು ಕಂಡರೆಂತೋ ಅಂತೆ
ಗಿರಿ ಪಂಕ್ತಿ, ತರುರಾಜಿ, ಬರಿಯ ಕಪ್ಪನೆ ಕಾರಿ
ನಿಂತಿಹವು ಕಾಡಿಗೆಯ ಮುದ್ದೆಗಳವೊಲು ತೋರಿ!
ಕಾರ್ಮುಗಿಲ ಹುತ್ತದಿಂ ಬಂದಹಿಯೊ ಎಂಬಂತೆ
ಮಿಂಚಿರಲು, ಮೊದಲಾಯ್ತು ಮಳೆಯ ಹೊಡೆತವು ಹೊರಗೆ.
ಬಿರುಗಾಳಿ ಗಿರಿರಾಜರಿಬ್ಬರೊಳಸಂಚಿನೊಳು
ಆ ಜಳದ ತಿರೆಗುರುಳುತಿರುವನಹ! ಮಿಂಚಿನೊಳು
ಸ್ವರ್ಣತಂತುಗಳಂತೆ ಮಳೆಯ ಧಾರೆಯು ಮಿನುಗೆ!-
ಇಂತು ಮನ ಈವೂರ ಕುಟುಕು ಮಳೆಯನು ಕಂಡು
ನೆನೆಯುತಿದೆ ಭದ್ರಾವತಿಯ ಮಳೆಯ ಸೊಬಗುಂಡು!
*****
