ಅಲ್ಲ ಅಂಗಡ್ಯಾಗ, ಬೆಲ್ಲ ಬಾಜರದಾಗ
ಎಲ್ಲರ ಮಾತ ಮನದಾಗ | ಇಟಗೊಂಡು
ಬೆಲ್ಲದ್ಹೇರಾಗಿ ಬರುವೀನೆ ||
ಬೇವಿನ ಆ ಗಿಡಕ, ಬೆಬ್ಬದ ಕಟ್ಟೆ ಕಟ್ಟಿ
ಜೇನ ತುಪ್ಪದಲಿ ಹೊಯ್ನೀರ | ಹಣಿಸಿದರ
ಬೇವು ತನ್ನಿಸವ ಬಿಡಲಿಲ್ಲ ||
ಜೀವಕ ಬಂದರ, ತಾಯಾರ ತಂದ್ಯಾರ
ಮೈದೂನರ್ಯಾರ ಮಗನ್ಯಾರ | ಸಾವಾಗ
ಕೈಹಿಡಿದರಾಯ ಕಡೆಗಾದ ||
ಮಾತಿಗೆ ಮಲಕಿಲ್ಲ, ನೀತಿಗೆ ತೊಡಕಿಲ್ಲ
ಸಾಸಿಕಾಳಿಗೆ ಹುಳಕಿಲ್ಲ | ಅತ್ತಿಮನಿ
ಸೋಸಿ ನಡದರು ಅರಿಕಿಲ್ಲ ||
ಸತ್ತು ಹುಟ್ಟುದೊಲ್ಲೆ, ಸಾವಗಂಡನ್ನೊಲ್ಲೆ
ಸತ್ತಿಕರ ಮಗಳ ಗೌವರವ್ವ | ನಿನ್ನಂತ
ಮುತ್ತೋದಿತನವ ಇಡು ನಮಗ ||
ಹಿರಿಯರಿಗೆ ಹಿರಿಯನ್ನು, ಕಿರಿಯರಿಗೆ ಕಿರಿಯನ್ನು
ನೆರೆಗಡ್ಡದವರ ಮುದುಕರ | ಕಂಡರ
ತಲೆಬಾಗಿ ನಡಿಯೊ ನನ ಮನವ ||
ಕಾಣದ ಮಾತಿಗೆ, ಖಂಡಗಂದರೇನ
ಬಂಡಮಾಡವರ ಗೊಡವೇನ | ತುಂಬಿದ
ಬಂಡಿ ನಡೆದ್ಹಂಗ ನಡೆದೇನ ||
ಕೊಟ್ಟು ಕುದಿಯಲು ಬೇಡ, ಇಟ್ಟು ಹಂಗಿಸಬೇಡ
ಇಷ್ಟುಂಡರೆಂದು ಅನಬೇಡ | ಈ ಮೂರು
ಮುಟ್ಟ್ಯಾವ ಶಿವನ ಸದರಿಗೆ ||
ಸಂಗಮಾಡೇನವ್ವ, ಲಿಂಗವಂತರ ಕೂಡ
ಬಂಗಾರಕಿಂತ ಬಲು ಹೆಚ್ಚು | ಇದ್ದವರ
ಸಂಗಮಾಡಿನಿ ಅನುಗಾಲ ||
ಕಾಚುಕಾಡಿಗೆ ಹೀನ, ಊಚ ನಾಲಗೆ ಹೀನ
ಆಚಾರಹೀನ ಗರತಿಽಯ | ಮನಿ ಮುಂದ
ಮೀಸಿ ಬಂದಣನ ನಗೆಹೀನ ||
ತನ್ನಂತೆ ನೋಡಿದರೆ, ಭಿನ್ನ ಭೇದವನಿಲ್ಲ
ತನ್ನ ಹೊಟ್ಟೆಽಯ ಸಿಸುವಂತೆ | ನೋಡಿದರ
ಕಣ್ಣ ಮುಂದೈತೆ ಕೈಲಾಸ |
*****
