ಕನ್ನಡಾಂಬೆ ಎಲ್ಲಿರುವಳೊ ಅಣ್ಣ
ಕರ್ನಾಟಕದಲ್ಲಿ
ದಿಕ್ಕು ದಿಕ್ಕಲೂ ಹುಡುಕಿದರಿಲ್ಲ
ಕಾಣೆಯಾದಳೆಲ್ಲಿ?
ಬೆಂಗಳೂರಲಿ ಸುತ್ತಿ ನೋಡಿದೆ
ಕಡತಗಳಲ್ಲಿ ಕಣ್ಣಾಡಿಸಿದೆ
ವಿಧಾನಸೌಧ ಮೆಟ್ಟಿಲೇರಿದೆ
ಎಲ್ಲೂ ಕಾಣಲಿಲ್ಲ
ನಾಡ ಗೌಡ ಆ ಕೆಂಪೇಗೌಡ
ಅವನ ಕೂಡ ನಾ ತೋಡಿದೆ ದುಗುಡ
ಕನ್ನಡಾಂಬೆ ಎಲ್ಲಿ? ನನ್
ಕನ್ನಡಾಂಬೆ ಎಲ್ಲಿ?
ಕಲ್ಲು ಮೂರ್ತಿ ಮಾತಾಡಿದನಲ್ಲಿ
ಖಡ್ಗ ಹಿಡಿದ ಕೈ ಕೆಳಕ್ಕೆ ಚೆಲ್ಲಿ
ಕಂಬನಿಯನು ಚೆಲ್ಲಿ
ನಿನ್ನ ಹಾಗೆ ನಾನ್ ತಬ್ಬಲಿ ಇಲ್ಲಿ
ತೆರಳು ತೆರಳು ಹುಚ್ಚ !
ಬೇಡ ಸಮಯ ವೆಚ್ಚ
ಬೆಳಗಾವಿಯಲಿ ಕನ್ನಡ ಇಲ್ಲ
ಬಳ್ಳಾರಿಯಲಿ ತೆಲುಗೇ ಎಲ್ಲ
ಕೊಡಗಿನಲಿ ಮಲಯಾಳಿ ಸೊಲ್ಲ…
ತಲೆಗೇರಿತು ಅಮಲು
ಇಲ್ಲಿಲ್ಲದ ಕನ್ನಡತಿಯನರಸಿ
ಪರನಾಡಿಗೆ ನಾ ಪಯಣವ ಬೆಳೆಸಿ
ಹುಡುಕಿದೆ ಎಲ್ಲೆಲ್ಲೂ !
ಆಂಧ್ರದಲೆಲ್ಲೂ ತೆಲುಗು ತಾಯೆ
ದ್ರಾವಿಡ ದೇಶದಿ ತಮಿಳಿನ ಮಾಯೆ !
ಆಯಾ ನಾಡಲಿ ಆ ತಾಯ್ ವೈಭವ
ಸೋಲುಂಡಿತು ಜೀವ
ಅಲ್ಲೂ ಇಲ್ಲ ಇಲ್ಲೂ ಇಲ್ಲ
ಕನ್ನಡಾಂಬೆ ಎಲ್ಲೆಲ್ಲೂ ಇಲ್ಲ
ಅವಳ ಸುಳಿವನು ಕೊಟ್ಟಂಥವರಿಗೆ
ಕಾದಿದೆ ಬಹುಮಾನ ! ನನ್
ಎದೆಯಲಿ ಸನ್ಮಾನ !
*****
