ಮೊಬೈಲು ಎಸ್ಸೆಮ್ಮೆಸ್ಸು ಬಂದು
ಭಾವಿಸುವರು ರದ್ದಿ ಕಾಗದದಂತೆ
ಕೋರಿಯರ್ ಆನ್‌ಲೈನು ಬಂದು
ಕೈಗೆ ಕೋಲು ಬಂದಂತೆ ಭಾವಿಸಿ
ಸಾಲದು ಎಂಬುದಕೆ
ಕಾಯಿನ್ ಬೂತು ವಕ್ಕರಿಸಿದ್ದು
ಬಿಟಿ ಬದನೆ ಬಂದಂತೆ
ಎನ್ನ ಕುಲಕ್ಕೆ ಆಯಿತು ಸಂಚಕಾರ
ಈ ಜಗತ್ತೇ ಹಾಗೆ-
ಹೊಟ್ಟೆ ತುಂಬಿಸುವವರಿಲ್ಲ
ಅರೆ ಹೊಟ್ಟೆಯಲಿ ಕಾದು ಕುಳಿತಿಹೆನು
ಚಾತಕ ಪಕ್ಷಿಯಂತೆ
ಎನ್ನ ಹೊಟ್ಟೆ ತುಂಬಿಸಿ
ನನ್ನ ನಂಬಿದವರ ಹಸಿವ ನೀಗಿಸಿ
ಸದಾ ಸಿದ್ಧ ನಿಮ್ಮ ಸೇವೆಗೆಂದು
ಊಹಿಸಿ ನನ್ನ ಸ್ಥಿತಿ-
ಬಳಿದಿಹರು ಎನ್ನ ಮೈಗೆ ಬಣ್ಣ ಕೆಂಪು
ಚಿಕ್ಕವರಿಂದ ದೊಡ್ಡವರವರೆಗೆ
ಮುಟ್ಟುವರು ಪ್ರೀತಿಯಲಿ
ಪಡುವರು ಸಂತಸ ಮೈ ಸವರುತಲಿ
ಕೋರ್‍ಟು ಕಛೇರಿ ಬಸ್ಟ್ಯಾಂಡಿನಲಿ
ಶಾಲಾ ಕಾಲೇಜು ಪೇಟೆ ಬಜಾರಿನಲಿ
ನನ್ನಯ ಠಾವು ಆದರೂ!
ಮುಖ ಹಾಕುವವರಿಲ್ಲ ನನ್ನ ಕಡೆಗೆ
ಜೋಕುಮಾರನ ಬಾಯಿಗೆ
ಮೆತ್ತಿದ ಬೆಣ್ಣೆಯಂತೆ
ಹೊಟ್ಟೆ ತುಂಬಿ ಬಿರಿದು ತುಳುಕುತಿದ್ದರೂ
ತುರುಕುತಿದ್ದರು ಎನ್ನ ಬಾಯಿಗೆ
ಆದರೀಗ!
ಕಳಾಹೀನ ಸವಕಲು ಮಸುಕು ಡಬ್ಬಿ
ಯಾರಿಗೂ ಬೇಕಿಲ್ಲ ನಾನು
ಯಾರಿಗೂ ಬೇಕಿಲ್ಲ ನಾನು.
*****
