ಇಷ್ಟ ಲಿಂಗದ ಸ್ಪಷ್ಟತೆ ಇಲ್ಲಿ ಕಾಣುವುದು
ಕಗ್ಗತ್ತಲೆಯ ಗೂಡಿನ ಬ್ರಹ್ಮಾಂಡವಿದು
ಅಜ್ಞಾನದ ಪರದೆಯಿಂದ ಸುತ್ತಿಹುದು
ಜ್ಞಾನ ಜೋತಿಯ ಚೇತನ ಒಳಗಿಹುದು
ಇಷ್ಟಲಿಂಗ ಎನ್ನುವ ಭೂಮಂಡಲವಿದು.
ಸಾಮಾನ್ಯರ ಕೈಗೆಟುಕದ ದಿವ್ಯ ಚೇತನವು
ಧ್ಯಾನದ ಮೂಲಕವೇ ದಿವ್ಯ ಜೋತಿಯ ದರ್ಶನವು
ಕೆದಕಿದಷ್ಟು ಉದ್ಬವಿಪ ಜ್ಞಾನ ಅಕ್ಷಯ ಪಾತ್ರೆಯಿದು
ಜೀವನ ಪೂರ್ತಿ ಶೋಧಿಸಿದರೂ ಸಿಗದು ಪೂರ್ಣತೆಯು
ಅಲ್ಪ ಜ್ಞಾನವನರಸಿಯೂ ಧನ್ಯ ನಿನ್ನ ಜೀವನವು.
ಅಂಗದೊಳಗಿಟ್ಟು ನೇರ ದೃಷ್ಟಿಯನೆಟ್ಟು
ಶಾಂತ ಚಿತ್ತದಿ ಸಂಚರಿಸಿದರೆ ಮನದೊಳು
ಜ್ಞಾನ ಜ್ಯೋತಿ ಗೋಚರಿಸುವುದು ಆತ್ಮ ಸಾಕ್ಷಿಗೆ
ಕೆದಕಿ ಪಡೆದು ನೀನಾಗು ಜ್ಞಾನದ ಬೆಳಕು
ಆ ಜ್ಯೋತಿಯಿಂದ ತೊಲಗಿಸು ಜಗದ ತಮಂಧತೆಯನ್ನು.
ಇಷ್ಟ ಲಿಂಗದೊಳ್ ಹುಟ್ಟುವುದು ಸಹಜ
ಜ್ಞಾನವಿಲ್ಲದ ಬಾಳದು ಎಣಿಸುವುದು ಅಸಹಜ
ಬಾಳಿಗೆ ಬೇಕು ಜ್ಞಾನ ಜೋತಿಯ ಬೆಳಕು
ನೀನೇ ಆಗು ಆ ಜ್ಞಾನ ಜ್ಯೋತಿಯ ತುಣುಕು
ನಿನ್ನಿಂದಲೆ ಹರಡಲಿ ಮಾನವತೆಯ ಬೆಳಕು.
*****
