ಗೆಳತಿ, ನೀನಾದರೆ ಸನಿಹ
ಮೂಡುವುದು ಕವಿತೆ
ಇಲ್ಲವಾದರೆ ಕತೆ
ಆರಿಸಿಕೊ ನಿನಗ್ಯಾವುದು ಇಷ್ಟ
ಬೇಡ ನನ್ನ ಚಿಂತೆ
ನನಗಿರುವಾಗ ನಿನ್ನ ಚಿಂತೆ /ಪ//
ನನ್ನ ಪ್ರೀತಿ ಅಚಲ
ಇರಬಹುದು ಅದು ಹಿಮಾಚಲ
ಇದಕೆ ಬೇಕಿಲ್ಲ ಸಮರ್ಥನೆ
ಮಾಡಿದರೂ ನೀ ನಿರಾಕರಣೆ
ನೀನು ಬದುಕಬೇಕು
ಬದುಕಿ ಬಾಳಬೇಕು
ಇದು ನನ್ನ ಹರಕೆ
ಪ್ರೀತಿ ಕಾವ್ಯದ ಅರಿಕೆ
ಗೊತ್ತು, ಬದುಕು ಕಡಲು
ಹೆಬ್ಬಲೆಗಳು ಅದರ ಒಡಲು
ಆದರೆ ನಾನು ನಡುಗಡ್ಡೆ
ನಿನಗೆ ಎಂದಾದರೂ ತಂಗಲು
ಹೃದಯವಿರುವ ನೀನು
ಹೃದಯವನ್ನು ಬಲ್ಲೆ
ಇಷ್ಟೆ, ಸಾಕು ಇಲ್ಲಿ
ಮಾತು, ಸಮಾಜಕಿರಲಿ
*****
