ಅಂತರಂಗದಿ ಕರುಣವಿರಿಸುವ
ಅಂತರಾತ್ಮ ವಿಚಾರನೆ
ಭ್ರಾಂತಿಹರ ಅದ್ವೈತ ಸಿದ್ಧನೆ
ಸ್ವಾಮಿ! ಚಿಂತವಿದೂರನೇ
ನಿಮ್ಮ ನುಡಿಗಳ ಕೇಳಿ ತಣಿದೆನು
ಸರಿ ಇದೆನ್ನುತ ತಿಳಿದೆನು
ಕರುವು ತಾಯನು ಅಗಲಿದಂದದಿ
ಏನೊ ಬಳಲುತಲಿರುವೆನು
ಹಿಂದು ಮುಂದುಗಳೊಂದನರಿಯದೆ
ಸುತ್ತ ನೋಡುತಲಿರುವೆನು
ದ್ವಂದ್ವಭಾವವನಳಿಸಲಾರದೆ
ನಿರುತ ಯೋಚಿಸುತಿರುವೆನು
ಸಗುಣ ನಿರ್ಗುಣ ಸರ್ವವ್ಯಾಪ್ತನ
ಸಚ್ಚಿದಾನಂದಾತ್ಮನ
ಅಗಣಿತನ ಆ ವೇದಪುರುಷನ
ತಿಳಿಯಲಾರದೆ ಸೋತೆನು
ಅಣುವು ಮಹತುಗಳೊಳಗೆ ತುಂಬಿಹ
ವಿಶ್ವಶಕ್ತಿಗೆ ಮಣಿವೆನು
ಮುನಿಗಣಸ್ತುತ ಘನ ಮಹಾತ್ಮನೆ
ಭಜನೆ ಮಾಡುತಲಿರುವೆನು
ಒಮ್ಮೆ ಕಾಂತಿಯ ಕಡಲ ಕಾಂಬೆನು
ಒಮ್ಮೆ ತಳಮಳಗೊಂಬೆನು
ಒಮ್ಮೆ ಹರುಷದಿ ನಲಿಯುತಿರುವೆನು
ಒಮ್ಮೆ ಕಂಬನಿಗರೆವೆನು
ನಿಮ್ಮ ತತ್ವವನರಿಯದಿರ್ದೊಡೆ
ತನ್ಮಯತ್ವವನರಿವೆನೆ?
ಮಾನ್ಯ ಓ ಗುರುದೇವ ನಿಮ್ಮನು
ಭಗಿನಿ ಜನಕಜೆ ಮರೆವೆನೆ
*****
