ನಮಿಸುವೆನು ನಮಿಸುವೆನು ನಮಿಸುವೆನು ತಾಯೆ
ನಿನ್ನ ಪ್ರೀತಿಗೆ ಬಾಗಿ ಕೈಮುಗಿದೆ ಕಾಯೆ
ಜನಮನದಲಿ
ಗಿರಿವನದಲಿ
ಉಸಿರಾಗಿ ಹಸಿರಾಗಿ ಹರಿಯುತಿಹ ಮಾಯೆ
ಬಲ್ಲೆ ನಾ ನಿನ್ನ ದನಿ ಕಲರವದಲಿ
ಮೈಬಣ್ಣ ಉದಯಾಸ್ತ ಮುಗಿಲುಗಳಲಿ
ನಡಿಗೆಯಿದೆ ಹರಿಯುತಿಹ ತೊರೆಗಳಲ್ಲಿ
ಉಡಿಗೆ ಮೈಲಿಗಳುದ್ದ ಹಸಿರಿನಲ್ಲಿ
ಕಣ್ಣಿನೆಚ್ಚರವಾದ ಹಗಲಿನಲ್ಲಿ
ಕನಸಿನಚ್ಚರಿಯಾದ ರಾತ್ರಿಯಲ್ಲಿ
ನಿದ್ದೆ ಎಚ್ಚರಗಳಲಿ ಕಾಯುತಿರುವ
ಜೀವವನು ಅನುಭವಕೆ ತೇಯುತಿರುವೆ
ನಿನ್ನ ಕೀರ್ತಿಗೆ ಕಾದಿದವರು ನೆಲೆ ನಿಂತರು
ಇತಿಹಾಸದಲ್ಲಿ ಮನ ಹೂಡಿ
ನೀನಿತ್ತ ಮೈಮನಸು ನಿನ್ನದೆ ಇದೋ ಕೊಡುವೆ
ಕವಿದ ಜಡಭಾವ ದೂಡಿ
*****
