ಯಾರದೀ ವಿಶಾಲತೋಟ ಕಾಡು ಮೇಡು?
ಯಾರಿದರ ಮಾಲಿಕ?
ಬೆಳೆಸಿಕೊಂಡಿದ್ದಾನೆ ಅಲ್ಲಲ್ಲಿ
ಸೂರ್ಯ ಚಂದ್ರ ತಾರೆಯರ
ಮಂಗಳ ಬುಧ ಗುರು ಶುಕ್ರ
ಶನಿ ರಾಹು ಕೇತು
ಗ್ರಹ ನಕ್ಷತ್ರಗಳಾ ಬೆಳೆ!
ಆಗಾಗ ಬೆಳೆಸುವನು ಮತ್ತೆ
ಕಾಲನ ಕಾದಾಟಕೆ ಮಿಂಚು ಮೋಡ
ಧುಮಕೇತು ಗ್ರಹಗಳ ಕಚ್ಚಾಟ
ನಕ್ಷತ್ರಗಳ ತಿಕ್ಕಾಟ
ನೇಗಿಲಯೋಗಿ ಸಪ್ತರ್ಷಿಗಳ ಪ್ರೀತಿ
ನೀಲಿಕಾಡು ಮತ್ತೆ ಶಾಂತ
ಯಾರಿದರ ಮಾಲಿಕ-
ಕಾಮನಬಿಲ್ಲಾಗಿ ಕಾಮಣ್ಣ
ಹೊಸಹೊಸ ಬೀಜಗಳಾ ಬಿಡಿಸಿ
ಯುರೆನಸ್ ನಪ್ಚೂನ್ ಪ್ಲೂಟೋ….
….ಬೆಳೆಗಳಾ ಬೆಳೆಸುತಾ…
ಶಿವ ಸಂಚರಿಸುವಾ ಕಾಡಿದು
ಬೆಳೆಸಿಕೊಳ್ಳಬಹುದಿಲ್ಲಿ ನಾವೂ
ಕಲ್ಪನೆಗಳ ಮೂಟೆ ಮೂಟೆ ಕನಸುಗಳ ಬೆಳೆ
ಹಾಲುನೊರೆಯ ತೆರೆಗಳ ಸಾಲುಗಳ ನಡುವೆ
ಬೆಳ್ಳಿ ಮೋಡಗಳಂಚಿಗೆ
ಮನಸುಗಳ ಬೀಜ ಹಾಕಿ
ಭಾವ ತೇವಗೊಳಿಸಿ
ಪ್ರೀತಿ ಹದವಾಗಿಸಿದರೆ
ಕಣ್ತುಂಬ ನೀಲಿ ಕಾಡೇಕಾಡು
ಓಡಾಡಿ ಸುಖಿಸಬಹುದೊಂದಿಷ್ಟು…..
*****
