Home / ಕವನ / ಕವಿತೆ / ಕ್ಯಾಟ್‌ವಾಕ್ ಹುಡುಗಿ (Model Girl)

ಕ್ಯಾಟ್‌ವಾಕ್ ಹುಡುಗಿ (Model Girl)

ಹೊಟ್ಟೆಪಾಡು ನೋಡಿ
ಅಗೊಮ್ಮೆ ಈಗೊಮ್ಮೆ ಬೆಕ್ಕಿನ ಹೆಜ್ಜೆ
ಇಡಬೇಕಾದ ಪ್ರಸಂಗ
ಹದಿನೆಂಟರ ಸುಂದರಿ
ನಗು ಮಾತು ಅಷ್ಟಕ್ಕಷ್ಟೇ
ಕುಹಕಿಗಳು ಇದು ಸೈಕಿಕ್ ಇರಬೇಕಂದದಷ್ಟೆ.
ಯಾರಿಗೂ ಗೊತ್ತಿಲ್ಲ ಅವಳು ಯಾರು!

ರಾಜಕುಮಾರಿ ಗಂಭೀರವದನೆ
ಮದವೇರಿದ ಕಣ್ಣುಗಳಿಗೆ
ಮಧು ತುಂಬಿಟ್ಟ ಗಾಜು ಹೂಜೆ
ತಿಳು ಸೊಂಟ ನೀಲಿ ಕಣ್ಣು
ಬಿರಿದ ತುಟಿ ತುಂಬೆಲ್ಲ ಕೃತಕನಗು
ಅರೆಬೆತ್ತಲಿನ ಕ್ಯಾಟ್‌ವಾಕ್ ಹುಡುಗಿ
ಯಾರಿಗೂ ಗೊತ್ತಿಲ್ಲ ಅವಳು ಯಾರು!

ಹೆಸರು ವಿಳಾಸ ಕೇಳಿದಷ್ಟು
ಫೋನ್ ಇಲ್ಲ, ಈ ಊರಿನವಳೇ ಅಲ್ಲ-
ನೂರೆಂಟು ನೆಪ ಹೇಳಿ
ಒಳಗೊಳಗೇ ಕೊರಗಿ
ಕಣ್ಣು ತುಂಬಿಕೊಳ್ಳುವ ಹುಡುಗಿ
ಯಾರಿಗೂ ಗೊತ್ತಿಲ್ಲ ಅವಳು ಯಾರು!

ಬಟ್ಟೆ ಬರೆ ಚಿನ್ನಾಭರಣ
ಮಿಕ್ಸಿ, ಸೋಪು ಓಪೇರಾಗಳಿಗೆ
ಪಾರದರ್ಶಕ ಬಟ್ಟೆಯ ನಾಜೂಕಿನ
ಕ್ಯಾಟ್‌ವಾಕ್ ಹುಡುಗಿ ಮಾಡೆಲ್‌ಗರ್ಲ್
‘ಸುಜಿ’ ಅಷ್ಟೇ ಪರಿಚಯ.
“ಸೌಂದರ್ಯ ಸ್ಪರ್ಧೆಯ ಸುಂದರಿ
ಮಿಸ್ ಬೆಂಗಳೂರ”
ಕಿರೀಟು ಧರಿಸಿದ್ದು ಕೇವಲ ಕಿರುನಗೆ
ಒಳಗೊಳಗೆ ಅವಳೆದೆಗೆ ಹರಿತಚೂರಿ
ಯಾರಿಗೂ ಗೊತ್ತಿಲ್ಲ ಅವಳು ಯಾರು! ಎಲ್ಲಿಯವಳು.

ಪತ್ರಿಕೆಯ ಮುಖಪುಟಕೆ ಗ್ರಾಸು ‘ಸುಜಿ’
ವಿವರ ಹುಡುಕುವ ತಡಪಡಿಕೆ ಟಿ.ವಿ. ಪೇಪರದವರಿಗೆ –
ಮೂಲಕಥೆ ಹೊರಗೆಡವಲು ಆತಂಕ
ವೇಶ್ಯೆಯ ಮಗಳೆನ್ನುವ ಹಿಂಸೆಗೆ
ನೇಣು ಹಾಕಿಕೊಂಡ ‘ಸುಜಿ’
ಸೂಳಿಗೇರಿಗೆಲ್ಲ ಆಶ್ಚರ್ಯ.

ಮರುದಿನ ಮುಖಫುಟಕೆ
ನೇಣು ಚಿತ್ರ, ಮೇಲೆ ತಲೆಬರಹ
“ಅವಳು ಯಾರು ಆಗಿಯೇ ಉಳಿಸಬಹುದಿತ್ತು”
*****

Tagged:

Leave a Reply

Your email address will not be published. Required fields are marked *

ಚಾಮುಂಡಿ, ದುರ್ಗಿ, ಕಾಳಿ, ಶಂಕರಿ, ಮಾರಿ ಮೊದಲಾದ ದೇವಿಗಳಿಗೂ : ಆಂಜನೇಯ, ವಲ್ಲಭರಾಯ, ನರಸಿಂಹ ಮೊದಲಾದ ದೇವರುಗಳಿಗೂ ನಮ್ಮೂರಲ್ಲಿ ಏನೂ ಕೊರತೆಯಿಲ್ಲ. ಇಲ್ಲೊಂದು ಶಂಕರಿ ದೇವಾಲಯ ಬಹುಕಾಲದಿಂದಲೂ ಇದೆ. ಅದನ್ನು ಕಟ್ಟಿಸಿದವರು ಯಾರೆಂಬುದೇ ಗೊತ್ತಿಲ್ಲ. ಪ್ರತಿ ಶನಿವಾರ ಅಭಿಷೇಕ, ಶುಕ್ರ...

ರಾಜ ನಿಮಗೆ ಗೊತ್ತೆ? ಇಲ್ಲ? ಆತ ನನ್ನ ಸ್ನೇಹಿತ, ಆಪ್ತ ಸ್ನೇಹಿತ. ಅವನಿಗೂ ಕತೆ ಬರೆಯುವ ಹುಚ್ಚಿದೆ. ಆದರೆ ಬರೆದು ಸಂಪಾದಿಸಿ ಬದುಕುವ ಹಟವಿಲ್ಲ. ಹಾಗೆಂದೇ, ತಕ್ಕಮಟ್ಟಿಗೆ ಸಂಪಾದನೆ ಇರುವ ಬೇರೆ ಉದ್ಯೋಗದಲ್ಲಿದ್ದಾನೆ! ರಾಜ ಬರೆದಿರುವ ಒಂದು ಕಥೆ ನನ್ನಲ್ಲಿದೆ. ಓದಿ ನೋಡುತ್ತೀರಾ? ನಿಮ...

ಅಂದು ನಾನು, ನಮ್ಮ ತಾತ, ನನ್ನ ತಂಗಿ ಎಲ್ಲರೂ ಕಣದಲ್ಲಿ ಕುಳಿತುಕೊಂಡು ಹರಟೆ ಹೊಡೆಯುತ್ತಿದ್ದೆವು. ಸುಗ್ಗಿಯ ಕಾಲವಾದ್ದರಿಂದ ರೈತರು ಮತ್ತು ಆಳುಗಳು ಕಣದಲ್ಲಿ ಕೆಲಸ ಮಾಡುತ್ತಿದ್ದರು. ನಮ್ಮ ತಾತನು ಆ ಮಾತು ಈ ಮಾತು ಆಡುತ್ತಿದ್ದರೂ, ಆತನ ಒಂದು ಕಣ್ಣು ಮಾತ್ರ ಕೆಲಸಗಾರರ ಮೇಲೆಯೇ ಇರುತ್...

ರಾಜಗೃಹದ ಬಳಿಯ ಗೃಧ್ರಕೂಟ ಪರ್ವತ. ಪರಮಾತ್ಮನಾದ ಬುದ್ಧದೇವನ ಪವಿತ್ರ ಪಾದಧೂಳಿಯಿಂದ ಪುನೀತವಾದ ಗಿರಿವರದ ನೆತ್ತಿ. ನೆತ್ತಿಯ ನೆಲೆಯಲ್ಲಿ ಎರಡು ಗುಹೆಗಳು. ಅಲ್ಲಿ ಇಬ್ಬರು ಬೌದ್ಧ ಸನ್ಯಾಸಿಗಳು ಧ್ಯಾನಶೀಲಾನುಷ್ಠಾನಾದಿಗಳಿಂದ ನಿರ್‍ವಾಣವನ್ನು ಸಾಧಿಸುತ್ತಿದ್ದರು. ಇಬ್ಬರೂ ಅಕ್ಕ ಪಕ್ಕದ ...

ವ್ಹಾಲೆಂಟಾಯಿನ್ ಡಿಗ್ಬಿಯು ಭೋಜನವನ್ನು ತೀರಿಸಿಕೊಂಡು ‘ಹಾವಾನಾ ಸಿಗರ’ (ತಂಬಾಕದ ಸುರುಳೆ) ಸೇದುತ್ತೆ ತನ್ನ ಆರಾಮ ಕುರ್ಚಿಯಲ್ಲಿ ಯಥಾಸುಖವಾಗಿ ಕುಳಿತು ಏನೇನೋ ವಿಚಾರ ಮಾಡುತ್ತಿದ್ದನು. ಸುಗಂಧಿತವಾದ ಸಿಗರದ ಹೊಗೆಯು ಕಾಮಿನಿಯ ಕೇಶಕಲಾಪದಂತೆ ಸುರುಳೆ ಸುರುಳೆಯಾಗಿ ಅಂತರಿಕ್ಷದಲ್ಲಿ ಗಾಳ...

೨-೨-೧೯೩೦ “ಹೆಣ್ಣಿನಿಂದ ಮಾನವನಿಗೆ ಎಂದೂ ತೊಂದರೆಯು. ಅವಳು ಚೆಲುವೆಯಾದರೆ, ಅವಳನ್ನು ಪಡೆಯಬೇಕೆಂಬಾಸೆಯನ್ನು ಇತರರಲ್ಲಿ ಉಂಟು ಮಾಡುವಳು; ಅವಳ ಗಂಡನು ಪ್ರೇಮ ಸಂಶಯಕ್ಕೆ ಸಿಲುಕುತ್ತಾನೆ. ಅವಳು ಕುರೂಪಿಯಾಗುವಳೆ, ಅವಳ ಗಂಡನು ಇತರರನ್ನು ನೋಡಿ ಅಸೂಯೆ ಪಟ್ಟು, ಆ ಅಸೂಯೆಯಿಂದ ತೊಂ...