ಮನದನ್ನೆ

ಮಾನಾಪಮಾನವನು ತೊರೆದು ಬಂದೆನು ನಲ್ಲೆ
ಏನಾದರೇನೆನಗೆ ನೀನೆ ಗತಿ ನಾ ಬಲ್ಲೆ

ನೀನೊಲಿದು ಮುದ ಬೀರೆ, ನಿನ್ನ ನಗೆ ಮೊಗದೋರೆ,
ನಾನಹುದು ನಿನ್ನ ಬಗೆ ಮುಗಿಲೊಳಿಹ ಧೃವತಾರೆ.

ಎನ್ನಂತರಂಗದಲಿ ನೀನೆ ನರ್ತಿಸುತಿರುವೆ
ನಿನ್ನ ಪ್ರತಿಬಿಂಬ ನಾನಂತೆ ವರ್ತುಸುತಿರುವೆ

ನನಗೆಲ್ಲಿ ಅಸ್ತಿತ್ವ! ನಿನ್ನೊಳಿದ ಒಳಸತ್ವ
ಮಿನುಗಿಲ್ಲಿ ಮೈಗೊಂಡು ನಿಂತಿರುವ ಮಹತತ್ತ್ವ

ನೀನು ರೂಪಿಸಿದಂತೆ ನಾನು ವ್ಯಾಪಿಸುತಿಹೆನು
ಭಾನು ಬೀರುವ ಬೆಳಕ ನಾ ಹೋಲುತಿಹೆನು

ನೀನೆನ್ನ ಸಂಜೀವಿ ನಾ ಬರಿಯ ಮೃತ ಜೀವಿ
ನಿನ್ನೆದೆಯ ಕನಸಿನಲಿ ಅಲೆಯುತಿಹ ಅನುಭಾವಿ

ನಿನ್ನ ಕಲ್ಪನೆ ಕುದುರಿ ಕೆತ್ತಿರುವ ಮೂರ್ತಿನಾ
ನಿನ್ನ ಜೀವನದೊಡನೆ ಸಾಗಿ ಬಹ ಕೀರ್ತಿ ನಾ

ನೀನಿಲ್ಲದಿರೆ ನಾನು ಕುರುಡು ಕಣ್ಣಿನ ಭಾನು
ನೀನೆಲ್ಲಿ ನಾನಲ್ಲಿ ತುಂಬಿ ತುಳುಕುವ ಜೇನು

ಕುರುಡು ಪ್ರೇಮಕೆ ಎನ್ನ ನೀನೆ ಎರಡೂ ಕಣ್ಣು
ಬರಡು ಜೀವನಲತೆಗೆ ಫಲಿಸಿ ಬಹ ಹಣ್ಣು

ಹೆಣ್ಣಲ್ಲ ನೀನು ಬರಿ ಎನ್ನ ಪ್ರೀತಿಯ ದೂತಿ
ಪುಣ್ಯವೆನ್ನಯದೀಗ ಫಲಿಸಿರುವ ಹೊಸ ರೀತಿ
* * *

ಯಾವ ಮಾತಿನಿಂದ ನಿನ್ನ ಭಾವ ತಿಳಿಯಲಿ!
ಯಾವ ಕೃತಿಯನೆಸಗಿ ನಿನ್ನ ಹೇವ ಬೆಳೆಸಲಿ!

ಎಂತು ಎನ್ನ ಅಂತರಂಗವನ್ನು ತಿಳಿಸಲಿ!
ಚಿಂತೆಯೊಂದೆ ಹೇಗೆ ನಿನ್ನ ಪ್ರೀತಿ ಗಳಿಸಲಿ!
* * *

ದೇವ ತೋರು ಕರುಣೆ ಬೀರು ದಿಕ್ಕುಗಾಣದಾಗಿಹೆ
ನೋವನಿತ್ತು ಕಾವ ಬಗೆಯನಿಂತು ಅರಿಯದಾಗಿಹೆ

ಪ್ರೇಮವನ್ನೆ ಬಸಿರೊಳಿರಿಸಿ ಪ್ರೇಮವನ್ನೆ ಉಸಿರುವಂತೆ
ಪ್ರೇಮಪುತ್ಥಳಿಯ ಮಾಡು ಪ್ರೇಮ ಜೀವ ಉದಿಸಿದಂತೆ
* * *

ನಿನ್ನ ಮನಸೆ ನನ್ನ ಮನಸು ನಿನಗೆ ವಿಜಯವಾಗಲೀ
ಎನ್ನಹಂಕಾರವಳಿದು ನಿನ್ನ ತನವ ಪಡೆಯಲಿ.
*****