೧
ನಸುಗಾಳಿ ಮೆಲ್ಲನೆ, ಸುಳಿಸುಳಿದು ತೆಳ್ಳನೆ,
ತೀಡುತಿತು ಮೋದದಲಿ ಆನಂದವನದಿ;
ಮುಗುಳಿನ ಸಲೆಕಂಪು, ಕುಕಿಲಗಳ ಕೊರಲಿಂಪು
ಮನವನ್ನೆ ಮಿಡಿದಿತ್ತು ಸಂತಸದಿ ಅ೦ದು.
೨
ಝುರಿನೀರು ತಿಳಿ ಹರಿದು, ಚಿಗಿಚಿಗಿದು ನಡೆನೆಗೆದು,
ಬನವನ್ನು, ಮನವನ್ನು ಏಕದಲಿ ಬೆರೆದು;
ಅನಿಲದಲಿ ಮೈಮರೆದು ಮೇಘದಲಿ ಹೊರಳಿಳಿದು
ದೂರಿದನು ತೋರಿದನು ಚಂದಿರನು ಅಂದು.
೩
ಪಡುವಿನ ಚಲುಕಾ೦ತಿ, ಚಂದಿರನ ಮೊಗಶಾಂತಿ,
ಕೂಡುತಿತು ಮೇದಿನಿಯ ಆನಂದವನದಿ;
ಕಿರಣಗಳು ಸ್ವರ್ಣದಲಿ ಜ್ವಲಿಸುತಿತು ಹಿರಿಮೆಯಲಿ
ಅಲರಲ್ಲಿ ಮುಗುಳಲ್ಲಿ ಸವಿಯನ್ನು ತುಂಬಿ.
೪
ತೆಳ್ಳನೆಯ ತಂಗಾಳಿ, ತುಂಬುತಿರೆ ಕಂಗಳನು,
ತನ್ಮಯದಿ ಮೈಮರೆದೆ ಆನಂದವನದಿ;
ಮಧುಭಾವ ಮೂಡಿರಲು, ಒರತೆಯ ತೆರವಿರಲು
ನೋಡಿದೆನು ಸಗ್ಗವನು ಆನಂದವನದಿ.
೫
ನಿಶ್ಯಬ್ದವನದಲ್ಲಿ, ನಿಸರ್ಗಭವನದಲ್ಲಿ,
ನಿಶ್ಯಬ್ಧವನಿತೆಯಾ- ನಂದವನದಲ್ಲಿ-
ನೋಡಿದೆನು ದೇಗುಲದಿ ಮಾಲಿನಿಯ ಮೂರ್ತಿ
ಕೂಡಿಯೇ ರಾಗದಲಿ ಆನಂತಪೂರ್ತಿ.
*****
