ನಿತ್ಯವೂ ವಿಶ್ವರಂಗದ ಪ್ರಕೃತಿ ಮಂಟಪದಿ
ವಿಧ ವಿಧ ಚಲಚ್ಚಿತ್ರಗಳು ಭವ್ಯಭಾವಗಳ-
ನೊಳಗೊಂಡು, ನಿಯತ ನವ್ಯತೆಯನ್ನು ಬೀರುತ್ತ,
ನಿಷ್ಕಾಮ-ನಿಸ್ವಾರ್ಥ ದೃಷ್ಟಿಯಲಿ ದರ್ಶಿತಗ-
ಳಾಗಿ ಮೆರೆಯುತ್ತಿಹವು.
ವಿಶ್ವ ಪುರುಷನೆ ಚಿತ್ರ-
ನಿರ್ದೇಶಕನು. ವಿವಿಧ ವಿಹಗ ತತಿಗಳ ಗಾನ
ಲಹರಿಯೇ ಸಂಗೀತ ಮಾಧುರ್ಯ,
ಕಣ್ಣಿದಿರ
ಉಷೆನಾರಿ, ನದಿನೀರೆ, ಯಾಮಿನೀ ಕಾಮಿನೀ,
ಬನವೆಣ್ಣು, ಸಂಧ್ಯಾವಧೂ – ಆದಿ ಪ್ರಖ್ಯಾತ
ನಟಿಗಳೇ, ನಭದೊಳಿಹ ಪ್ರತ್ಯಕ್ಷ ತಾರೆಗಳೆ
ಹೆಸರಾಂತ ‘ತಾರೆ’ ಗಳು.
ಅರುಣ, ದಿನಕರ, ಚಂದ್ರ,
ಸಾಗರ, ವಸ೦ತಾದಿ ನಟವರೇಣ್ಯರು ನಟಿಪ-
ರೀ ವಿಲಕ್ಷಣ-ನಿತ್ಯ- ನೂತನ- ಯಥಾರ್ಥವಹ
ವರ ಚಲಚ್ಚಿತ್ರ ಪ್ರದರ್ಶನದಿ!
ಆದರಿದ-
ರತಿಶಯಿತ ಸೌಂದರ್ಯ ದರ್ಶನಾನುಭವಕ್ಕೆ
ಬಾಹ್ಯ ಚಕ್ಷುಗಳಿಂದಲೂ ಕೂಡ, ಆಂತರಿಕ
ಜ್ಞಾನ ದೃಷ್ಟಿಯ ನೋಟವತ್ಯಧಿಕ ಸಹಕಾರಿ!
*****
೧೯೩೯
