ಪ್ರಿಯ ಕಿಟಿ,
ಮೇಪ್, ಅವರಿಗೆ ಗುಪ್ತವಾಸದ ವ್ಯವಸ್ಥೆ ಆದ ಬಗ್ಗೆ ಹೇಳಿದಾಗ ಡಸೆಲ್ ಭಯಂಕರ ಖುಷಿಯಾದರು. ಆಕೆ ಆದಷ್ಟು ಬೇಗನೇ ಬಂದು ಸೇರಿಕೊಳ್ಳಲು ತ್ವರೆ ಮಾಡಿದಳು. ಅದರಲ್ಲೂ ಶನಿವಾರ ಬರುವಂತೆ ಹೇಳಿದಳು. ಆದರೆ ಅವರು ಆ ದಿನ ಸಾಧ್ಯವಾಗುವ ಬಗ್ಗೆ ಸಂದೇಹ ವ್ಯಕ್ತಪಡಿಸಿದರು. ಅವರಿಗೆ ತಮ್ಮ ರೋಗಿಗಳ ಇಂಡೆಕ್ಸ ಕಾರ್ಡನ್ನು ಅಪ್ ಟು ಡೇಟ್ ಮಾಡಿಕೊಳ್ಳಬೇಕಿತ್ತು. ಹಾಗೇ ಕೆಲವು ರೋಗಿಗಳನ್ನು ಪರೀಕ್ಷಿಸಬೇಕಿತ್ತು ಮತ್ತು ತಮ್ಮ ಅಕೌಂಟನ್ನು ಸರಿಯಾಗಿ ಇಡಬೇಕಿತ್ತು. ಇಂದು ಮುಂಜಾನೆ ಮೇಪ್ ಈ ಎಲ್ಲ ವಿಷಯಗಳನ್ನು ಹೊತ್ತು ನಮ್ಮಲ್ಲಿಗೆ ಬಂದಳು. ಡಸೆಲ್‌ರ ಈ ವಿಳಂಬ ನೀತಿ ಜಾಣತನದಲ್ಲ ಎಂದು ನಮಗನ್ನಿಸಿತು. ಈ ಎಲ್ಲ ಸಿದ್ಧತೆಗಳು ನಾವು ನಮ್ಮೊಂದಿಗೆ ಇರಿಸಿಕೊಳ್ಳಲು ಬೇಡವೆಂದು ಹೇಳಿದ ಹಲವಾರು ಜನರಿಗೆ ಉತ್ತರ ನೀಡಬೇಕಾದ ಅನಿವಾರ್ಯತೆಯನ್ನು ಉಂಟುಮಾಡುತ್ತಿದ್ದವು. ಮೇಪ್ ಶನಿವಾರ ಡಸೆಲ್‌ರಿಗೆ ಬರಲಾಗದೇ ಎಂದು ಕೇಳಲು ಪುನಃ ಹೊರಟಿದ್ದಳು.
ಡಸೆಲ್ ಅದಕ್ಕೆ ಆಗದೆಂದರು. ಈಗವರು ಸೋಮವಾರ ಬರುತ್ತಿದ್ದಾರೆ. ಏನಾದರೂ ಆಗಲಿ ಅವರು ಸಿಕ್ಕ ಅವಕಾಶವನ್ನು ಒಮ್ಮೆಗೆ ಒಪ್ಪಿಕೊಳ್ಳಲಿಲ್ಲ ಎಂಬುದು ವಿಚಿತ್ರ ಹುಚ್ಚುತನವೇ ಎಂದು ಹೇಳುತ್ತೇನೆ. ಒಂದೊಮ್ಮೆ ಅವರೇನಾದರೂ ಹೊರಗಡೆ ಸಿಕ್ಕಿಬಿದ್ದಿದ್ದರೆ ತನ್ನ ಇಂಡೆಕ್ಸ್ ಕಾರ್ಡಗಳನ್ನು ಸರಿಮಾಡಿಕೊಳ್ಳುತ್ತ, ಹಣದ ಲೆಕ್ಕಾಚಾರ ಹಾಕುತ್ತ, ರೋಗಿಗಳ ನೋಡುತ್ತ ಇರುತ್ತಿದ್ದರೇ? ಯಾಕೆ ವಿಳಂಬ ಮಾಡುತ್ತಿದ್ದಾರೆ? ಹೀಗೆ ಒಪ್ಪಿಕೊಂಡಿದ್ದು ಡ್ಯಾಡಿಯ ಮೂರ್ಖತನ ಎಂದು ನನಗನ್ನಿಸಿದೆ. ಬೇರೇನೂ ಸುದ್ದಿ ಇಲ್ಲ.
ನಿನ್ನ,
ಆನ್
