ಗಿರಿತರುಗಳೆಡೆಯಲ್ಲಿ ತಿಳಿಗೊಳದ ಕೆಲದಲ್ಲಿ
ಮೆಲ್ಲಮೆಲ್ಲನೆ ಸುಳಿದು ಸಾರಿಬರುವ
ಮಂದಮಾರುತ ನಗಿಪ ಬಿರಿಮುಗುಳ ಮಲ್ಲಿಗೆಯ
ಮೈಸಿರಿಯ ತನಿಗಂಪು ಬಹಳ ಚೆಂದ ೧
ಬಡತನದ ಬಾಳಿರಲಿ ರೋಗರುಜಿನಗಳಿರಲಿ
ಮನದ ಕೋಟಲೆಗಳೆಷ್ಟೆಷ್ಟೆ ಇರಲಿ
ಅರಳು ಮಲ್ಲಿಗೆಯ ಸಮ ಕರುಳು ಕಂದನನು
ತಾಯಿ ಎದೆಗಪ್ಪಿ ನಲಿಯುವುದು ಚೆಂದ ೨
ಹಸರು ಪೈರಿನ ಮೇಲೆ ಬೀಳುತಿರೆ ಕಡೆ ಬಿಸಿಲು
ಗರಿಗೆದರಿ ಕುಣಿಯುತ್ತ ಕಂಠವೆತ್ತಿ
ಕೇಕೆ ಹಾಕುವ ನವಿಲ ಕಡು ಚೆಲುವ ತಾ ಕಂಡು
ಮೈಮರೆವ ರಸಿಕನಾನಂದ ಚೆಂದ ೩
ತುಂಬಿ ಹರಿಯುವ ನದಿಯ ತೀರದಲಿ ಕುಳ್ಳಿರ್ದು
ಕೋಗಿಲೆಯ ಗಾನದಲಿ ಮೈಯಮರೆತು
ತನ್ನ ಮುಂದಿನ ಬದುಕುಗಳ ಬಗೆಗಣ್ಣಿನಿಂ
ನೋಡಿ ಮನದಲ್ಲಿ ಬರೆವುದತಿ ಚೆಂದ ೪
*****
