ತಿಪ್ಪೆಗುಂಡಿಯ ಬಿಸಿಯ ಬೂದಿಯಲಿ ಮೈಮುದುರಿ
ಮಲಗಿ ಜೋಂಪಿಸುತಿರುವ ಗಂಡು ನಾಯಿ;
ಹಸಿದು ಕುಸಿದಿಹ ಹೊಟ್ಟೆಗೊಂದು ತುಕಡಿಯ ಬಯಸಿ
ಮೆಲ್ಲನೆದ್ದಿತು; ಅಂತೆ ಮೈಯ ಮಣಿಸಿತು ನಿಂತು
ತೆರೆದು ಬಾಯಿ.
ಲಟಪಟನೆ ಕಿವಿಯ ಬಾರಿಸಿ ದೂಳು ಜಾಡಿಸಿತು
ಹೊರಟಿತು ಸಂದಿಯಲಿ ಗತ್ತು ಹಿಡಿದು.
ಮೂಲೆಗಲ್ಲನು ಕಂಡು ಕಾಲನೆತ್ತುವ ಜಾತಿ
ನೂರು ಶತಮಾನಕೂ ಇದುವೆ ನೀತಿ
ಏನು ಕಂಡಿತೊ ಗಂಡು-
ಗುರಿಯಿಟ್ಟ ಗುಂಡು.
ಕಣ್ಣನರಳಿಸಿ ಕಿವಿಯ ನಿಗುರಿಸಿತು
ಬಾಲವಲ್ಲಾಡಿಸಿತು ನೆಲನೊಮ್ಮೆ ಮೂಸಿ ನೋಡಿ
ಕೂಗಿ ಕರೆದಿತು ಜೀವ
ಕುಂಯ್ ಕುಂಯ ರಾಗಮಾಡಿ!
ಎದುರು ಮನೆಯಲಿ ನಿಂತು ಬಾಲವಲ್ಲಾಡಿಸಿತು
ಶ್ರೀಮಂತ ಹೆಣ್ಣು ನಾಯಿ.
ಅದಕಿಲ್ಲ ಇದರಂತೆ ಹೊಟ್ಟೆ ಪಾಡಿನ ಚಿಂತೆ
ಕಟ್ಟಿ ತಿನಿಸಿದ ಬೊಜ್ಜು ಬೆಳೆದ ದೇಹಿ!
ಮನೆಯ ಹುಡುಗಿಯ ತೊಡೆಯ ಮೇಲೆ ಬೆಳೆಯುವ ಪುಣ್ಯ
ಅಗ್ರಗಣ್ಯ….
ಬ್ರೆಡ್ಡು ಬಿಸ್ಕೀಟು ಸಾಬೂನ ಸ್ನಾನ
ತನ……..ನ….ನ್ನ……..ತಾನ……..ನಾನಽ!
****
ಗಂಡು ನಾಯಿಯ ಹೊಟ್ಟೆ ಹಸಿವೆಯಡಗಿತು ಆಗ
ಮೈಯ ಹಸಿವೆಯ ಮುಂದೆ ಯಾವ ರಾಗ?
ಹೆಣ್ಣು ಕಾತರಿಸಿತ್ತು ಗಂಡು ಹಿಂದೋಡಿತ್ತು
ಸೃಷ್ಟಿಯೇ ಮೈಮರೆತು ಜೋಂಪಿಸಿತ್ತು.
*****
