ಭೋಳ್ಯಾ

ಲೇ ಮೈತೊಳದ ಬಸವಣ್ಣ
ನಿಮ್ಮಪ್ಪ ಶಿವಪ್ಪನ ಕೂಡ ನೀನು ಬೋಳಿಸಿಗೊಂಡ್ಯಾ,
ಅವನಂತೂ ಹೇಳೀಕೇಳಿ ಸುಡುಗಾಡಿಗೊಡೆಯ
ಅವಂಗೆ ಬೂದಿ ಬಡಿಯ
ಮಾತೆತ್ತಿದ್ರೆ ತೋರಸ್ತಾನೆ ಮಸಣಾ,
ಉರೀಬೇಡ ನೀ ಆಗ್ತೀ ಹೆಣಾ!
ಅಂತಾ ಹೆದರಸ್ತಾನೆ

ಉಣ್ಣೋರುಣ್ಲಿ ತಿನ್ನೋರ್ತಿನ್ಲಿ ಅಂದ್ರೆ
ಬರ್ತಾತ ನಿನ್ನ ಕಪಾಲ ಕೈಯಾಗೆ ನಿಮ್ಮಪ್ನಂಗೆ
ಬೆಳ್ಳಗಿದ್ದದ್ದೆಲ್ಲಾ ಹಾಲಂತೀ,
ಥಳ್ಳೆಂದದ್ದೆಲ್ಲಾ ಬೆಳ್ಳೀ ಅಂತೀ
ತುಟಿ ಮಾತ್ನ ಹೊಟ್ಯಾಗಿನ ಮಾತಂತ ನಂಬ್ತೀ
ಎಳೇಮುದ್ದಂತ ಹಾವಿನ ಮರೀನ ಮುದ್ದಿಸ್ತೀ
ಬಣ್ಣಾ ನಂಬಿ ಹೂ ಮೂಸಾಕ್ಹೋಗ್ತಿ,

ಹಾಲು ಸುಣ್ಣದ ನೀರಾಗಿ, ಬೆಳ್ಳಿ ಉರಿಯೋ ಕೊಳ್ಯಾಗಿ
ಹೂವಿನ ಕೆಳಗಿನ ಮುಳ್ಳು ಚುಚ್ಚಿ,
ಹಾವು ಉರುಲಾಗಿ ಕಚ್ಚಿದಾಗ
ಲೇ ಭೋಳ್ಯಾ ಭೋರ್ಯಾಡಿ ಅಳ್ತೀ
ಮತ್ತೆ ಮಣ್ಣು ತೂರ್ಯಾಡಿ ಶಪಿಸ್ತೀ
ಕೊನಿಗೆ ನಿಮ್ಮಪ್ಪನ ಮನಿದಾರೀ ಹಿಡಕಂಡು
ಹೊಯ್ಕೊಂತ ಹೋಗ್ತೀ
*****