ಏನ ಮಾಡಲಿರುವೆ ನೀನು

ಏನ ಮಾಡಲಿರುವೆ ನೀನಿದುವರೆಗೆ
ಯಾರು ಮಾಡದ
ಏನ ಕಲ್ಪಿಸಲಿರುವೆ ಯಾರಿದುವರೆಗೆ ಕಲ್ಪಿಸದ

ಬಲೆಯ ನೇಯುವೆಯ ಜೇಡ
ಆಗಲೇ ನೇಯ್ದಿದೆ
ಕಲೆಯ ಬರೆಯುವೆಯ ಆ-
ಕಾಶ ಆಗಲೇ ರೂಪಿಸಿದೆ

ಮುತ್ತ ಪೋಣಿಸುವೆಯ ಇಬ್ಬನಿ
ಆಗಲೇ ಪೋಣಿಸಿದೆ
ಪರಿಮಳವ ಹರಡುವೆಯ ತೋಟ
ಆಗಲೇ ಹರಡಿದೆ

ಬೆಳಕು ಹರಿಸುವೆಯ ಬೆಳಗು
ಆಗಲೇ ಹರಿಸಿದೆ
ತಂಪು ಸುರಿಸುವೆಯ ತಿಂಗಳು
ಆಗಲೇ ಸುರಿಸಿದೆ

ಮಿಂಚುವೆಯ ಮಿಂಚು
ಆಗಲೇ ಮಿಂಚಿದೆ
ಧ್ವನಿಸುವೆಯ ಗುಡುಗು
ಆಗಲೇ ಧ್ವನಿಸಿದೆ.

ಕನಸು ಕಟ್ಟುವೆಯ ನಿದ್ದೆ
ಆಗಲೇ ಕಟ್ಟಿದೆ
ನೆನಸು ಕಾಣಿಸುವೆಯ ಕನ್ನಡಿ
ಆಗಲೇ ಕಾಣಿಸಿದೆ

ಕುದಿಯುವೆಯ ಬೆಂಕಿ
ಆಗಲೇ ಕುದಿಯುತಿದೆ
ಕರಗುವೆಯ ಮಂಜು
ಆಗಲೇ ಕರಗುತಿದೆ

ಚಲಿಸುವೆಯ ಲೋಕ
ಆಗಲೇ ಚಲಿಸಿದೆ
ಸುಮ್ಮನಿರುವೆಯ ದೈವ
ಯಾವತ್ತೂ ಸುಮ್ಮನಿದೆ
*****