ಪ್ರಾಕಿನ ಬಯಕೆ

ದಾರಿಯುದ್ದಕ್ಕೂ ಚಡಪಡಿಕೆ
ಪಕ್ಕಕ್ಕೆ ಪ್ರಾಕಿನ ಅಜ್ಜ
ದೂರ ಸರಿಯುವ ಬಯಕೆ
ಆತ ನಗುತ್ತಿದ್ದಾನೆ,
ಬೊಚ್ಚು ಬಾಯಗಲಿಸಿ ಮತ್ತದು
ತಂಬಾಕು ಸೋನೆ ವಾಸನೆ
ಕವಳ ಪೀಕು
ಆ ಕಣ್ಣುಗಳಲ್ಲಿ ಹಸಿವು ಪ್ರಾಯದ
ಬಯಕೆ, ಯಯಾತಿಯೇ ಇರಬೇಕು
ಸುಕ್ಕುಗಟ್ಟಿದ ಚರ್ಮದ ಒಳಗೂ
ಕಳವಳ ಕುಲುಕಾಟಕ್ಕೆ,
ಕಸಿವಿಸಿ ಮೈಸ್ಪರ್ಶಕ್ಕೆ.
ವಿಚಿತ್ರ ಹೇಕರಿಕೆ, ವಾಕರಿಕೆ
ನನ್ನಜ್ಜನೂ ಹೀಗೇನಾ?
ಅಪರ ಪ್ರಾಯದ ತಹತಹಕೆ:
ಮರ ಮುಪ್ಪಾ, ಹುಳಿ ಮುಪ್ಪಾ
ಹಸಿದವಗೆ ಹಳಸಿದರೂ ಹಿತವೆ
ಅನಾಹುತವಿದು
ಬುದ್ಧಿ ಹೇಳುವ ಮಂಡೆಗಿಲ್ಲದಿರೆ ಸದ್ಬುದ್ಧಿ.
*****