ಎಲ್ಲಿಂದಲಾದರೂ ಪ್ರಾರಂಭಿಸಬಹುದು
ಹೊಸ ಅಧ್ಯಾಯಗಳನ್ನು
ಅರ್ಥೈಸುವುದು ಹೇಗೆ?
ತಳಪಾಯವಿಲ್ಲದೇ ಮನೆ ಕಟ್ಟಿದ ಹಾಗೆ!
ಎಲ್ಲಿಟ್ಟು ಎಲ್ಲಿ ನೆಟ್ಟು
ಏಣಿ ಹತ್ತಿದರೂ
ಅಟ್ಟಗಳು ಸಿಕ್ಕಬಹುದು
ದಿಗಂತ ಸಿಕ್ಕುವುದೆಂತು?
ನಡೆಯಬಹುದು ಹೀಗೇ…
ಉದ್ದಕ್ಕೂ ಕಾಲುಸಾಗಿದೆಡೆಗೆ
ಗುರಿ ಸೇರದಾ ದಾರಿಗಳು
ಎಷ್ಟು ಸವೆದರೇನು?
ವಿತಂಡವಾದವ ಎಷ್ಟಾದರೂ ಮಾಡಿ
ಅವರಿವರ ಬಾಯ್ಮುಚ್ಚಬಹುದು
ಹೇಗೆ ಮುಚ್ಚುವುದು
ಈ ಅಂತರಾತ್ಮನಾ ಬಾಯಿ?
ಕೋಟೆಗಳೊಳಗೆ ಕೋಟೆಗಳ ಕಟ್ಟಿ
ಅಹಮ್ಮಿನ ಗೂಡೊಳಗೆ ಮೆರೆಯಬಹುದು
ತಿಳಿವಿನಾ ಏಕೈಕ ಕಿರಣವೂ
ಪ್ರವಹಿಸದ ಬದುಕು ಬದುಕೆ?
ಎಲ್ಲೆಲ್ಲವನ್ನೂ ಬಿಡದೇ
ಅಳೆದು ಬಿಡಬಹುದು
ತನ್ನ ತಾ ಅರಿಯಲಾಗದ
ಅಳತೆ ಎಷ್ಟು ತಿಳಿದರೇನು?
*****
