ಕೇಳಿಸದಾಯ್ತು ನನ ಗೀತ

ಕೇಳಿಸದಾಯ್ತು ನನ ಗೀತ
ಮೇಳದಿಂದೊಳಗೊಂಡ ಸುರರ ಸಂಗೀತ

ನನ್ನದೀಮನ ತಣಿಸಲೆಂದು
ನಿನ್ನ ಕರುಳಿನ ಆಳದಿಂದ ಹೊರಬಂದು
ಎನ್ನ ಜೀವಕೆ ಶಾಂತಿ ತಂದು
ತನ್ನ ತಾನದಿ ತಾನಗುಡುನ ಸಂಗೀತ

ಮನ ತುಂಬಿ ನಿನ್ನ ಹೊರಸೂಸಿ
ಮನೆ ತುಂಬಿ ನೆರೆತುಂಬಿ ತುಳುಕೀದ ರಾಸಿ
ದನಿಗೊಡುತ ದಿಕ್ಕೆಲ್ಲ ಹಾಸಿ
ನಿನದಿಸುವ ನಾದಮಯ ನಿನ್ನ ಸಂಗೀತ

ನೆನಪೀನ ಬಿರುಗಾಳಿ ಬೀಸಿ
ಮನದ ಕಾಸಾರದಿ ಅಲೆಗಳು ಸೂಸಿ
ತನುತೀರದಲ್ಲಿ ಅಪ್ಪಳಿಸಿ
ಕನಲೀಸಿ ಕೆಣಕುವವು ಎನ್ನ ಮೂದಲಿಸಿ

ಸುತ್ತೆಲ್ಲ ಮೌನವು ಮುತ್ತಿ
ಹತ್ತೊತ್ತಿ ಎನ್ನನು ತಾನು ಕತ್ತೆತ್ತಿ
ಕತ್ತಲ ಕೆಳದಿಯನೆತ್ತಿ
ಮುತ್ತಿಕ್ಕಿ ಕುಣಿವುದು ಎನ್ನನು ಸುತ್ತಿ

ಭಣಗುಡುತಲಿಹುದು ಆಕಾಶ
ರಣಗುಟ್ಟಿ ಹೊಡೆವುದು ರೌದ್ರ ಪ್ರಕಾಶ
ಕೆಣಕೀದ ಹುಲಿಯ ಆವೇಶ
ಅಣಕಿಸುತ ಅಲೆಯುವದು ತೂರಿ ಯಮಪಾಶ

ಪೂರ್ಣಿಮೆಯ ಪೂರ್ಣ ಚಂದ್ರಮನು
ವರ್ಣವಿಹೀನ ವದನನಾಗಿಹನು
ಕರ್ಣವ ನೀಡಿ ಕೇಳಿದನು
ವರ್ಣನೆಗೆ ನಿಲುಕದ ಗಾನ ಸುಧೆಯನ್ನು

ಕಂದನ ಮಲಗಿಸಲೆಂದು
ಅ೦ದ ಜೋಗುಳವಿಂದು ನನ ಮುಂದೆ ನಿಂದು
ನೊಂದಿರುವ ಮನ ರಮಿಸಲೆ೦ದು
ಬಂದಪ್ಪಿಕೊಂಡಿತು ಅಮೃತದ ಬಿಂದು
*****