ಇಂದಿಗಿಪ್ಪತ್ತೇಳು ವರುಷಗಳ ಹಿಂದೆ
ಬಂದಿತೀ ಜಗದೊಳಗೆ ಮಗುವು ತಾನೊಂದೆ
ಬರುವಾಗ ಬಾಯಲ್ಲಿ ಬೆಳ್ಳಿಬೆಳಕು!
ಇರುವಾಗ ಎಲ್ಲಿರುವದೇನೊ ಆ ಥಳಕು!
ಮಗುವು ಹುಟ್ಟಲು ಮೂರು ಹೆಳ್ಳಿಗಳಿಗೆಲ್ಲಾ
ನಗೆಯ ಸಕ್ಕರೆ ಚಿಸ್ಸಿ ಚೆಲ್ವರಿಯಿತಲ್ಲಾ!
ಬೆಳಕು ಚಂದ್ರಗೆ ಮೂರು ಮುಕ್ಕಾಲು ಗಳಿಗೆ
ಬಳಿಕ ಕಗ್ಗತ್ತಲೆಯು ತಾ ಬಹುದು ಬಳಿಗೆ!
ಜನ್ಮವರ್ಷವು ಅಥ ಶ್ರೀಪರಾಭವವು
ಜನ್ಮಾಂತರದ ಇತಿ ಶ್ರಿಸುವೈಭವವು!
***
ಅಮ್ಮಯ್ಯ ಅನಬೇಕು ಅಡಿಗು ಅಡಿಗೂ
ದಮ್ಮಯ್ಯ ಎನಬೇಕು ನುಡಿಗು ನುಡಿಗೂ!
ಹೊರಬೇಕು ಹೊರಬಾರದಂಥ ಅಪವಾದ
ಇರಬೇಕು – ಯಾರಿಚ್ಛೆ? ಬಂದ ಅಪರಾಧ!
ರಾಜರಾಜರ ಸತಿಯೆ ಮಾನಗೆಟ್ಟಿರಲು
ಸೋಜಿಗವೆ ನಿನಗೆ ಅವಮಾನ ತಟ್ಟಿರಲು?
ಸಹಿಸುವುದು ಸಹಿಸುವುದು ಅಹವು ರಾತ್ರ!
ಇಹಕು ಪರಕೂ ಇದುವೆ ಏಕಸೂತ್ರ!
ನರವೀರ ಮಾಡುವದು ನರಗುರಿಯ ಕಾರ್ಯ
ಗುರಿಯಿರದ ಹೊರೆಯಾಯ್ತು ಬಾಳ ತಾತ್ಪರ್ಯ!
***
ಹಾಲಿನಲಿ ನೀರ್‌ ಬೆರೆಯೆ ಕ್ಷೀರಾಮೃತಾ!
ಪಾಲಿನಲಿ ಬಂದುದೇ ಪಂಚಾಮೃತ
ಸಕಲವೂ ಕಲುಷಿತವು ರಾಮಭದ್ರಾ!
ಅಕಲಂಕ ನೀನೊಬ್ಬ ರಾಮಭದ್ರಾ!
ನಿನ್ನಾಜ್ಞೆ ನಿನ್ನಾಜ್ಞೆ ರಾಮಚಂದ್ರಾ!
ನಿನ್ನನುಗ್ರಹವಿರಲಿ ರಾಮಚಂದ್ರಾ!
ಎಂದಿಗಹುದೋ ದಯೆಯು ನೀನೆ ತರಲು!
ತಂದಿಟ್ಟವನೆ ನೀನೆ ಬಲ್ಲೆ ಬರಲು!
ಹರುಷವೇ! ತ್ರೀಹರಿಯೆ! ಸರ್ವೋತ್ತಮಾ!
ಪುರುಷಾರ್ಥ ಸಿದ್ಧಿಸಲಿ ಪುರುಷೋತ್ತಮಾ!
*****
