ಡಂಬಳ ಮಲ್ಲವ್ವ

ಸುಡಲಿ ಹೆಣ್ಣಿನ ಜಲುಮ |
ಹೆರವರ ಕೈಯಲಿ ಸಣ್ಣ ||ಪ||

ಹಡದವ್ವ ಹಡದಪ್ಪ, ಹಡದೇನು ಸುಡಬೇಕ
ಹಡೆದು ಹೆರವರಿಗೆ ಕೊಡಬೇಕ | ಸು | ಕಣ್ಣೀರು
ತಡೆದ ಮಳೆಯಾಗಿ ಸುರಿದಾವ || ೧

ಬೀಸಿ ಹಾಡುನ ಬಾರ, ಕಾಸು ಜಿಪುಣನ ಹಾಡ-
ಗಾಸ್ಯಾಕ ಬಾಳು ಜನುಮಕ | ಜಗದಾಗ
ಸೋಸಿ ನೆಡದಾರ ಸಂಸಾರ || ೨

ಪುಲಿಕೇಶಿ ದೊರೆಯಾಳಿ, ಕಲಕೆಲ್ಲ ತಿಳಿಯಾಗಿ
ಬಲಕಾಣಕೇಳೊ ದೊಡಬಸವ | ಡಂಬಳದ
ಕಳಸಾದ ತೇರ ಎಳೆದಾವ || ೩

ಹಿಡಿ ಹೊನ್ನು ಹನಿರಗುತ, ಎಡೆಕೆರೆಗೆ ಮಲ್ಲಮ್ಮ
ದೊಡಬಸವ ಸಾವ ಕರಕೊಂಡ | ಮಗರಾಮ
ಕಡೆಗಾದ ಕೆರೆಗೆ ಆಹುತಿಯ || ೪

ಕಾಸು ಕಾಸಿಗೆ ಜೀನ, ರಾಸಿ ಗಳಿಸಿದ ಹೊನ್ನು
ಆಸೆ ಉಣಲಿಲ್ಲ ಒಡಲೂಟ | ದೊಡ ಬಸವ
ವಾಸೆ ಬಡವರಿಗೆ ಡಂಬಳಕ || ೫

ಗುಣವಂತಿ ಮಲ್ಲಮ್ಮ, ಹಣವಂತ ಜಿಪುಣಾಗ
ಪುಣವಂತಿ ಮಡವಿ ಮನಿಯಾಗ | ದಯವಂತಿ
ತನುವಂತಿ ಡಂಬಳದ ಬಡಜನಕ || ೬

ಹೊಟ್ಟಿಗಿ ಉಣಲಿಲ್ಲ, ಬಟ್ಟಿ ಮೈಗುಡಲಿಲ್ಲ
ಕಟ್ಟಿನಾಗಿಟ್ಟ ಮನಿಯಾಗ | ಸಂಸಾರ
ದಿಟ್ಟ ಹುಟ್ಟ್ಯಾನ ಮಗರಾಯ || ೭

ಮಗಹುಟ್ಟಿ ಹದಿನಾರು, ಮುಗದೊಮ್ಮೆ ಬರಬಂತು
ಸಿಗಲಿಲ್ಲ ಜನಕ ಹಿಡಿಜೋಳ | ದೊಡಬಸವ
ಹಗೆ ತುಂಬಿ ಕಣಜ ಏರಿಸಿದ || ೮

ಬಂತು ಬೀಸುತ ಬರವು, ಎಂತು ಜನ ಗೋಳಾತೊ
ಕಂತು ಹರಕಾಯೊ ಜನವೆದ್ದು | ಡಂಬಳದ
ನಿಂತು ನಿಂತಲ್ಲೆ ಕೈಮುಗಿದು || ೯

ಬರದಾಗ ಕೆರೆಕಡಿಸೊ, ವರಶೆಟ್ಟಿ ದೂಡಬಸವ
ಹರನಿನಗ ಮೆಚ್ಚಿ ಮರತಾನೊ | ಲಕ್ಕಸಮಿ
ಸರದೀಪ ಹಚ್ಚೊ ಬಡವರಿಗೆ || ೧೦

ಕೆರೆ ಬತ್ತಿ ಡಂಬಳದ, ದೊರೆ ಕೇಳಿ ಬಾದಾಮಿ
ಮರಗ್ಯಾನ ಕರುಣಿ ಪುಲಕೇಶಿ | ಸಾರ್ಯಾನ
ತೆರಗಿ ಜನದಾಗ ಕಡತವೊ || ೧೧

ಗೋಳು ಕೇಳಿದ ಅರಸ, ಕಾಳ ಸಾರಿಗೆ ಹೇರಿ
ಕಳಿಸ್ಯಾನ ಜನಕ ದೊಡ ಬಸವ | ಡಬಳದ
ಗಳಿಸ್ಯಾನ ಜನದ ರಗತ್ಹಿಂಡಿ || ೧೨

ಕೇಳಿ ಕೊರಗಿತು ಮಂದಿ, ಗೋಳಿಟ್ಟು ಬೋರಾಡಿ
ಜೋಳ ಜೋಳೆಂದು ಮನಿಮುಂದ | ನೀಗ್ಯಾರ
ನಾಳೆ ನಾಳೆಂದ ದೊಡಬಸವ || ೧೩

ತಲೆಗಿಂಬಿಗ್ಹೊನ್ನಿಟ್ಟು, ಮಲಗಿ ಮಡಿಯಿತು ಮಂದಿ
ಕುಲಗೇಡಿ ಹೊನ್ನ ಕೂಡಿಸಿದ | ದೊಡಬಸವ
ತಳಮಳಿಸಿ ಮಡದಿ ಮನಿಯಾಗ || ೧೪

ಸಾವಜೀವಕ ಹಾಕೊ, ತ್ಯಾವೆಂದು ಹನಿನೀರ
ಸಾವುಕಾರೆಂದು ಜನ ಬಂತು | ಪತಿದೇವ
ಕಾಯೊ ಉಣನೀಡಿ ಕೈಮುಗಿವೆ || ೧೫

ಕರಗಾಲ ಊರ್ಹೊಕ್ಕಿ, ಎರವಾತ ಮಳೆಬೆಳೆಯು
ಬರಗಾಲ ಬಂತ ಡಂಬಳಕ | ಎಲೆ ಹೆಣ್ಣ
ತರವಲ್ಲ ನಿನ್ನ ಒಡಬಾಳ || ೧೬

ಕುಡಿದೆನೆಂದರ ಗಂಜಿ, ಒಡಕು ಕಾಸೆನಗಿಲ್ಲ
ಬಡವರಿಗೆ ಕೊಟ್ಟು ಸಲುವಾಕ | ತವರೂರ
ಒಡವೆಲ್ಲ ನಿಮ್ಮ ತಾಬಾಕ || ೧೭

ವಜ್ಜರುಂಗರ ತಾರ, ಹೆಜ್ಜಿ ಮೀರ್ಯಾವ ಮಾತ
ದರ್ಜೆನಂದ್ಹೋತ ಗಂಡಾಗಿ | ಎಲೆ ಹೆಣ್ಣ
ಲಜ್ಜೆ ನಿನಗಿಲ್ಲ ನುಡಿಲಾಕ || ೧೮

ತವರೂರ ಉಂಗುರಕ, ನೆವ ಏನ ಅಧಿಕಾರ
ಶಿವಶಿವನ ತಾಯಿ ಕೊಟ್ಟಾಳ | ಉಂಗುರದ
ಬವಣಿ ಬಿಡಲಿಲ್ಲ ಕಡೆತನಕ || ೧೯

ಸಾಕು ಸುಡಲೀ ಬಾಳ, ಯಾಕಮಾಡಿದಿ ಶಿವನ
ನಾಕ ಮಂದ್ಯಾಗ ಹೌದೆನಿಸಿ | ನಡೆದಾರ
ಜೀಕ ಕೈಲಾಸ ತೂಗೂದ || ೨೦

ಬಟ್ಟಿಗುಂಗರವಿಡಲು, ಇಟ್ಟವರ ನುಂಗೂದ
ಕೊಟ್ಟ ಹಡದವ್ನ ಕಿವಿಮಾತ | ನೆನಪಾಗಿ
ದಿಟ್ಟಿ ಮಲ್ಲಮ್ಮ ಕೈಗಿಟ್ಟ || ೨೧

ಬಳಿಗೆ ಬಾ ಮಗರಾಯ, ತಿಳಿಮಾತ ಕಿವಿಗಿಡುವೆ
ಮುಳಗಿದರ ಹೋತ ಈ ಜಲುಮ | ಡಂಬಳದ
ಕೆರೆ ಕಡಿಸು ಭಾರ ನಿನಮ್ಯಾಲೆ || ೨೨

ಹೊತ್ತಿಗಾಗದ ಜೀವ, ಸತ್ತ ಹೆಣ ಜಗದಾಗ
ಉತ್ತಮರ ಮಾತ ನಡಿಯಾವ | ಬಡಜನಕ
ಕುತ್ತು ಬಂದಾಗ ಉಣನೀಡ || ೨೩

ಮಲಗ್ಯಾಳ ಮಲ್ಲಮ್ಮ, ಬಲಗೈಯಾಗುಂಗೂರ
ಬೆಳಗಾಗಿ ಕಂಡ ದೊಡ ಬಸವ | ಇಟಗೊಂಡ
ಚಣಕ ಕರಕೊಂಡ ದುರುಮರಣ || ೨೪

ಹಡದವ್ವ ಹಡದಪ್ಪ, ಎಡಬಲಕ ಮಲಗ್ಯಾರ
ಬಡಕೊಂಡು ರಾಯ ಆಹುತಿಯ | ಕೆರೆಗಾದ
ಡಂಬಳದ ಸುದ್ದಿ ಹರಿದಾವ || ೨೫

ವಜ್ಜರುಂಗರ ಮುರಿಸಿ, ಜನ ಕೂಡಿ ಗುಡಿ ಕಟ್ಟಿ
ತೇರ ಎಳಿದಾರ ದೊಡಬಸವ | ಡಂಬಳದ
ಗರತಿ ಮಲ್ಲವ್ವ ತೆರಿ ಏರಿ || ೨೬

ಪುಲಕೇಶಿ ದೊರೆಯಾಳಿ, ಕಲಕೆಲ್ಲ ತಿಳಿಯಾಗಿ
ಬಲಕಾಣ ಕೇಳೊ ದೊಡಬಸವ | ಡಂಬಳದ
ಕಳಸಾದ ತೇರ ಎಳಿದಾವ || ೨೭
*****