ದೇವರು
ರಾಮಕೃಷ್ಣರೆ ಇರಲಿ ಹನುಮ ಗಣಪರೆ ಇರಲಿ
ಎಲ್ಲರೆಲ್ಲರಿಗೆಲ್ಲ ಒಬ್ಬ ತಂದೆ
ಲಕುಮಿ ಪಾರ್ವತಿ ಇರಲಿ, ದುರ್ಗೆ ಸರಸತಿ ಇರಲಿ
ವಿಶ್ವಕ್ಕೆ ಒಬ್ಬನೇ ಮುದ್ದುಕಂದ
ಸಂಸಾರ
ಮಡದಿ ಮಕ್ಕಳ ಬಿಟ್ಟು ಗುಡ್ಡಗವಿಯನೆ ಹೊಕ್ಕು
ತಪ್ಪಲನು ತಿಂದಾಗ ಯೋಗವಲ್ಲ
ಮಕ್ಕಳೊಂದಿಗೆ ಯೋಗ ಮಡದಿಯೊಂದಿಗೆ ಯೋಗ
ಮನೆಯಲ್ಲಿ ಶಿವಯೋಗ ಮುದ್ದುಕಂದ
ಸಮರ್‍ಥ
ವೇಸ್ಟು ಎಂಬುದನೆಲ್ಲ ಬೆನ್ನು ಮಾಡೈ ಕಂದ
ವ್ಯರ್ಥದಲಿ ಸಮರ್‍ಥ ಶಕ್ತಿ ತುಂಬು
ಹಳೆಯ ಕೊಳೆಯನು ಕಳೆದು ಕೊಳಚೆ ಕತ್ತಲೆ ತೊಳೆದು
ಆಗು ನೀ ಸಿದ್ಧಾರ್ಥ ಮುದ್ದುಕಂದ
ಊಟ
ಕಟಗರೊಟ್ಟಿಯು ಹೋತು ನಟ್ಟು ಕಡಿವುದು ಹೋತು
ಘೀರೈಸು ಇಡ್ಲಿಗಳ ಪ್ಲೇಟು ಬಂತು
ಬಿಸಿಲಾಗ ಅಂಬ್ರೇಲಾ ಚಳಿಯಾಗ ಮಫ್ಲರು
ಮೂಗು ಗಂಗಾನದಿಯು ಮುದ್ದುಕಂದ
*****
