ಎಂತು ನೀನಿಹೆಯೋ-ಪರಾತ್ಪರ
ಎಲ್ಲಿರುತಿಹೆಯೋ ?
ಎಂತು ನೀನಿಹೆಯೋ ನಿನೆಲ್ಲಿರುತಿಹೆ ನಿನ್ನ
ಅಂತವ ತಿಳುಹಿ ನಿಶ್ಚಿಂತನ ಮಾಡೆನ್ನ!
೧
ಅಣುರೇಣು-ತೃಣ- ತೃಟಿಯೊಳು ವ್ಯಾಪಿಸಿದ ನಿನ್ನ
ಘನತರ ರೂಪವನರಿತುಕೊಳ್ಳದೆಯೆ….
ಮನಕೆ ಬಂದಂತೆ ಚಿತ್ರಿಸಿ ಪೂಜಿಸುತ ನಿನ್ನ
ಅನುದಿನ ನಿರ್‍ನೆರ ದಣಿಯುತ್ತಲಿಹೆನೋ!
೨
ಕ್ಷೀರೋದನಿಧಿಯಲ್ಲಿ ವೈಕುಂಠಪುರದಲ್ಲಿ
ದೂರ ಕೈಲಾಸ-ಸ್ವರ್ಗದೆಳಿಹೆ ನೀನೆಂದು-
ಗಾರುಗೊಂಡಿಹೆನೋ ನಿನ್ನಯ ತಾಣ ತಿಳಿಯದೆ,
ಸಾರಿ ಹೇಳುವ ನಿನ್ನ ನುಡಿಯನ್ನು ನಂಬದೆ!
೩
ಕಲ್ಲು – ಕಂಚಿನ ಗೊಂಬೆಯಲ್ಲಿ ನಿಲ್ಲದಲೀಗ
ಫುಲ್ಲಹೃದಯದ ಯೋಗಿಗಳ ಮನದಿ ನಿಂದು,
ಬಲ್ಲಿದನೆ ನಿನ್ನಯಾ ಮೈಯನು ಮನೆಯನು
ಬಲ್ಲವನು ನಾನಾಗುವೊಲು ಬೋಧಿಸೆನಗೆ!
* * *
ಎಂತು ನೀನಿಹೆಯೋ-ಪರಾತ್ಪರ,
ಎಲ್ಲಿರುತಿಹೆಯೋ?
*****
