ಯತಿವರನೆ

ಯತಿವರನೆ ಶ್ರೀಗುರುವೆ
ಜನ್ಮಜನ್ಮದ ತಪವೆ
ಮೈಗೊಂಡು ನಿಂತಿರುವ ಕಲ್ಪತರುವೆ !

ಹಲವು ವರುಷದ ಹಿಂದೆ
ಕಲಿಕೆಯೆಲ್ಲವು ಸಂದೆ
ನಿನ್ನ ಸಂನಿಧಿಯಲ್ಲಿ ನಡೆದು ಬಂದೆ. ೧

ಕಾಳಕತ್ತಲೆಯಲ್ಲಿ
ಬಾಳದೀವಿಗೆಯಲ್ಲಿ
ಬೆಳಕನಿಡು ಗುರುವೆಂದೆ ನಿನ್ನಲ್ಲಿ. ೨

ಮರಳಿ ಬಂದಿಹೆನಿಂದು
ಮುರಿದ ಸಂಸಾರವನು
ನಿನ್ನ ಪಾದದಿ ಹಾಕಲಿಕೆ ತಂದು. ೩

ಕಂಡ ಬೆಳಕಿನ ಕಿರಣ
ಜಡಕೆ ಆಯಿತು ಶರಣ
ಹೌಹಾರಿ ಹೋಗಿಹುದು ನನ್ನ ಹರಣ. ೪

ಬೇಡುವುದ ಬಲ್ಲವನೆ
ಬೇಡಲೇನೈ ನೀನೆ
ಕ್ಷೇಮಪಥದಲಿ ನಡೆಸು ಜೀವನವನೆ. ೫

ಕೇಳಲಾರೆನು ದಯೆಯ
ಮಡದಿಮಗುವಿಗೆ ಮೈಯ
ನೆಮ್ಮದಿಯ ಸಂಸಾರಸಾರ ಸಿರಿಯ. ೬

ತಪ್ಪಡಿಯ ತೊಲಗುತಲಿ
ಸುಖಶಾಂತಿಯರಸುತಲಿ
ಹಿರಿಬಾಳ ಬೀದಿಯಲಿ ನಾ ನಡೆಯಲಿ. ೭

ಮೋಹಮಾಯೆಯ ಗೆಲಿದು
ಘೋರತಪವನು ಗೈದು
ಕಲ್ಲರಳಿ ದಯೆಯ ಹಿರಿ ಆಸರಾದೆ. ೮

ತನ್ನ ತಾನುದ್ಧರಿಪ
ತಪದ ದಾರಿಗೆ ಪೋಪ
ಶ್ರದ್ಧೆಯನು ಶಕ್ತಿಯನ್ನು ನಮಗೆ ನೀಡು. ೯

ನಿನ್ನ ಬಳಿಯಲಿ ಬಂದು
ದೈನ್ಯದಲಿ ಮೊರೆನಿಂದು
ಸೇವೆಯಲಿ ಬೇಡಿದುದಗಳಿಪೆವೆಂದು ೧೦

ಲೌಕಿಕದ ಕೊಡುಕೊಳೆಯ
ಬಳಸುತಲಿ ಬರುವ ಜನ
ಬಳಿಯಲಾರರು ತಮ್ಮ ಬಾಳಕೊಳೆಯ. ೧೧

ದೈನ್ಯದಂಭವ ಬಿಡಿಸು
ಸತ್ಯಧರ್ಮವ ಹಿಡಿಸು
ನಿನ್ನ ಧ್ರುವತಾರೆಯೇ ನಮ್ಮದೆನಿಸು. ೧೨
*****