ಹುಡುಕ್ಕೊಂಡ್ ಹೋಯ್ತೋ
ಹಕ್ಕಿ ಹುಡುಕ್ಕೊಂಡ್ ಹೋಯ್ತೋ
ಹಕ್ಕಿ ಹಾರಾಡ್ಕೊಂಡ್ ಹೋಯ್ತೋ ||
ಆ ಮರ ಈ ಮರ ನೆಲ ಮರ
ಶಾಶ್ವತವಲ್ಲದ ಮರ ರೆಂಬೆಕೊಂಬೆಗಳ
ಗೂಡುಗಳ ತೂರಿ ಹಾರ್‌ಕೊಂಡ್ ಹೋಯ್ತೊ ||
ಯಾವ ಜೀವ ಜೀವಿಗಳ
ದಾಹದಲ್ಲಿ ಮಾಡಿದ ಕರ್‍ಮ
ಅಂಗಸಂಗಗಳ ಬೆಸೆದು
ಅರಿವಿನ ಅಂಗಿನ ತೊಟ್ಟು ||
ಬೆಳೆದ ಬೇಸಾಯ ಫಲ ಫಲವಲ್ಲ
ಗಿಡಮರದ ಕಾಯಿ ಹಣ್ಣು ಹಣ್ಣಲ್ಲ
ಯಾವ ಕಾಯಕದ ನೆಲ ದಕ್ಕಿದೆ
ಹಕ್ಕಿ ಅದೇ ಕರ್‍ಮದ ಫಲ ||
ಸಾಸಿರ ನಾಮದ ಪುಣ್ಯದ ಫಲ
ಎಲ್ಲಾ ಫಲಗಳಲ್ಲಿ ಇಲ್ಲಾ ಬಲ
ಬೆಲೆ ಇಲ್ಲಾ ನೀ ರುಚಿಸುವ ತನಕ
ವೆಂಕಟರಮಣನಿಗೆ ಇಷ್ಟವಾಗುವ ತನಕ ||
ಹುಡುಕ್ಕೊಂಡ್ ಹೋಯ್ತೋ ಹಕ್ಕಿ
ರೆಕ್ಕೆ ಬಿಚ್ಚಿ ಸ್ವಚ್ಛಂದ ಹಾರಾಡಿ
ಬೆಟ್ಟ ಗುಡ್ಡ ಹಾದಿ ಗಟ್ಟಿಗಿತ್ತಿಯಾಗಿ
ತನ್ನನೊಳಗಣ ಗುರುಲಿಂಗನ ನೆನೆದು ||
ನೂರು ವರುಷ ದಾಟಿ ನೂರಾರು
ಬೆಳಕ ಚೆಲ್ಲಿ ಹಾಡಿ ಹಾಡ
ಬಣ್ಣಗಳನು ಅಂಗೈಯಲ್ಲಿ
ಹಿಡಿದ ಹಕ್ಕಿ ಚುಕ್ಕಿಯ ಬರೆದು ||
*****
