ಎಲ್ಲಿ ನೋಡಿದರು ಬಾಂಬು ಸ್ಫೋಟಗಳು
ರಕ್ತ ಮಾಂಸ ನೆಣವು
ಮುರಿದು ಬಿದ್ದ ಮನೆ ಮುರಿದ ಕಾಲು ಕೈ
ಬಣವೆಗಳಲಿ ಹೆಣವು
ಹೂವು ಹಿಡಿದ ಕೈ ಬೆಣ್ಣೆ ಬಾಯಿಯಲಿ
ಒಳಗೆ ಎಂಥ ಕ್ರೂರ
ನಾಗರಿಕತೆ ಹುಸಿ ವೇಷದೊಳಗೆ
ರಕ್ಕಸರ ರಾಜ್ಯಭಾರ
ಯಾವೊ ತೆವಲುಗಳು ಯಾವೊ ತೀಟೆಗಳು
ಗುಂಡಿಯೊತ್ತುತಿರಲು
ಎಲ್ಲೋ ದೂರದಲಿ ಸಿಡಿತ ಕಡಿತ
ಬ್ರಹ್ಮಾಂಡವೊಂದರುತಿರಲು
ನಿರಪರಾಧಿಗಳು ಕೂಸು ಕುನ್ನಿಗಳು
ಸಾವು ನೋವು ಗೋಳು
ಯಾವ ತಪ್ಪಿಗೀ ಶಿಕ್ಷೆ ಭೂಮಿಯಲಿ
ಹುಟ್ಟಿದ್ದೆ ತಪ್ಪೊ ಹೇಳು
ಗಾಳಿ ಬೀಸುತಿದೆ ಮಳೆಯು ಬೀಳುತಿದೆ
ಹಸಿರು ಹರಡುತಿಹುದು
ಮೋಡ ತೇಲುತಿದೆ ಮಿಂಚು ಮಿರುಗುತಿದೆ
ಹುಟ್ಟು ಹಾಡುತಿಹುದು
ತಾಯಿ ನಲುಗುವಳು ಗರ್ಭ ತಾಳುವಳು
ಬೇನೆ ಎಲ್ಲ ಒಂದೆ
ಜಾತಿ ಎಲ್ಲಿಹುದು ಜನನ ಮರಣಗಳ
ಸಾಲು ಸರಣಿ ಒಂದೆ
ಊಟ ತಿಂಡಿಗಳು ಉಡುಪು ತೊಡಪುಗಳು
ಮನೆಯ ವಾಸವೆಲ್ಲ
ನೋವು ನಲಿವುಗಳು ಬೇನೆ ಬೇಸರಿಕೆ
ಒಂದೆ ನೆರರಿಗೆಲ್ಲ
ಎಲ್ಲಿ ಬಂತು ಈ ಭೇದ ಭಾವ
ಮಾನವರ ಒಡೆಯುವಂಥ
ಮಾತು ಮನಗಳಲಿ ಹುಳುಗಳಾಡಿ
ಕೊರೆವ ಧರ್ಮಪಂಥ
ರಕ್ಕಸರು ಹೆಚ್ಚಿ ಬೊಕ್ಕಸವ ಕೊಚ್ಚಿ
ಕ್ರೌರ್ಯ ಮೆರೆಯುತಿಹುದು
ಜಾತಿ ರಾಜಕಾರಣದ ಕಸವು ಎಡೆ
ಬಿಡದೆ ಬೆಳೆಯುತಿಹುದು
ಒಡೆದು ಆಳುತಿದೆ ಮೆರೆದು ಬೀಗುತಿದೆ
ಹೆಣದ ರಾಶಿ ಮೇಲೆ
ಮತದ ಹೆಂಡದಮಲೇರಿ ವಾಲುತಿದೆ
ಹಣದ ಹಾಸಿಗೆಯಲೆ
*****
